13 Nov 2014

Batho ba ba ikopetseng go thusiwa ka  mananeo a nyeletso lehuma ba rotloeditswe go  bereka ka ditlhopha gore ba kgone maikaelelo a bone.

E rile a amogela baeng  kwa  thuto puisanong ya nyeletso lehuma kwa Otse bosheng,  Kgosi Mothusi Tsetse a  supa fa  go  bereka  ka  ditlhopha go ka ba solegela molemo bogolo thata fa ba utlwana ka megopolo. 

O   tlhalositse fa  ba ka thusana ka megopolo  fa   ba le setlhopha,  gape kgwebo e ka se eme   fa  yo  mongwe  a  tshwaregile go na le   fa motho   a  bereka  a le nosi mo a patelesegang  go tswala  madirelo fa a tshwaregile.

Kgosi Tsetse o supile  fa  lenaneo la go rua dipodi le dira sentle mo kgaolong ya gagwe,   sebe   sa   phiri e le bogodu jwa leruo jo bo diragalang kwa masimo.   O   kopile   batsena   thuto puisano e,  go ithuta  thata  mo go yone,  ka  jaana  dithuto tse ba di   neelwang e le tsone  tse  ba  yang   go di dirisa  mo isagong.

O supile    gape    fa   go    ka   nna    molemo gore  dikgwebo tsa  bone di atlege, ka  jaana ba  tla  a  bo ba  tlotlile moono   wa  ga tautona wa go nyeletsa lehuma la nta ya tlhogo,  gape ele sekao  mo go ba ba  santseng ba    tla    a    thusiwa    ka  lone.

Mogolwane  wa boipelego go tswa  kwa Taung,  Mme Masego Kgomotso, o supile fa bogologolo Batswana ba ne ba thusana go leka    go  nyeletsa lehuma, ka go neela bangwe ka  bone mafisa le gone go dira metshelo.   

O tlhalositse  gore e rile  ditlhabololo di goroga, di bo di nyeletsa  mokgwa o,  ka jalo puso e tsentse letsogo go thusa  ba kobo dikhutshwane ka  mananeo  a  a farologaneng.

Mme Kgomotso o tlhalositse fa go le botlhokwa gore motho a tlhophe  kgwebo e e gaufi  le maikutlo   a   gagwe  ka    jaana    go ka nna motlhofo  go   e  dira  ka   a  tla  a  bo a e dira ka  lorato.  O  supile fa gantsi  Batswana  ba dira  selo ka  ba bona mongwe a atlega   mo  go    sone mme    ese gore motho o nale kitso   le lorato la sone.                              

O tsweletse a re go  na   le  dikgwebo tse   ba   patelesegang go di pataganela mme a   kopa   botlhe ba  ba  atlegileng go emisa go bereka Ipelegeng ba patagantse le  kgwebo ka a re seo ga se supa  tlhoafalo.  

O  ba gakolotse gape go gakologelwa gore moono wa  go neelwa    mananeo a,   ke go ntsha  batho mo lehumeng le  gore  ba  thape    ba  bangwe  go  tokafatsa matshelo a bone. 

A re go botlhokwa   gore ba itse gore go  tlhokega    eng mo dikgwebong tsa  bone le gone gore  ba  ka dira jang  madi    jang gammogo le go    tlogela  go    bitsa    dikgwebo    tsa    bone   tsa   bommaboipelego mme   segolo bogolo ba kgothaditswe go kopa   thuso   fa  tsela   e    tsena ka   sekgwa.   BOKHUTLO