11 Nov 2014

Banni ba Makuta mo kgaolong  potlana ya Tutume ba galaleditse puso go bo e ba agetse letamo mo motseng. 

Mo potsolotsong le modulasetilo wa komiti e e tlhokomelang letamo leo, Rre Pateletso Tale o supile fa ba le lesego  ebile ba leboga puso go bo e tsweletse ka go baya dikeletso tsa bone kwa pele. 

A re kago ya letamo le e supa kgatelo pele, a tlatsa ka go tlhalosa gore batho ba tshwanetse go lemoga fa ditlhabololo di ka seka tsa goroga fela tsotlhe ka nako e le nngwe mme se se botlhokwa ke go amogela le go leboga tlhabololo nngwe le nngwe  e e gorogang.

Rre Tale a re letamo le le sale le agiwa dingwaga tse di masome a mabedi le bone tse di fetileng, mme se se itumedisang ke gore ga go motlhofo le kgalala. 

A re le ntswa bontsi jwa tiro go akarediwa ditsompelo tse di neng di epa le tsa kago e ne e le tsa puso, banni le bone ba ne ba tsenya letsogo ka mowa wa boithaopo.  

Rre Tale o tlhalositse fa letamo le le le botlhokwa thata mo matshelong a bone gonne le fa ka dinako tse dingwe ba a tle ba nne le tlhaelo ya metsi mo motseng, seemo ga se ke se nna maswe ka ba felela ba dirisa a letamo.

O supile gape fa letamo le le sologela leruo la bone molemo ka ba dirile thulaganyo ya go dirisa bontlha bongwe jwa lone go nosa leruo. 

A  re banni ba motse ba ithaopile go aga mokoro o go nosetswang mo go one e le go leka go itsa go nosa leruo mo dimpompong tsa setshaba.

Rre Tale a re le ntswa letamo le e le la morafe, komiti e e le tlhokomelang le bagolwane ba motse ba dirile tumalano ya gore ope yo o nosang leruo a ntshe masome a mabedi a dipula ka ngwaga e le tsela ya go kokoanya madi a a ka dirisiwang mo go le  tlhokomeleng.

Le fa go ntse jalo, Rre Tale o supa fa bangwe ba sa sale tumalano e morago ka ba felela ba nosa leruo kwa motseng mo dipompong tsa setshaba. BOKHUTLO