05 Oct 2014

Tona wa Dikgaolo le Tlhabololo Magae, Rre Peter Siele o roletse morafe wa Bakgatla lekoko le le romilweng ke Tautona Lt Gen Seretse Khama Ian Khama go batla tlharabololo ka dikgang tsa bogosi jwa bone.

E rile Tona Siele a rola semmuso lekoko leo ka Labotlhano kwa kgotleng kgolo ya Bakgatla kwa Mochudi, a supa lekoko le le eteletsweng pele ke Kgosi kgolo ya Bangwaketse Kgosi Malope II a tlhalosa fa ba tsile go buisana le morafe go tsaya megopolo mo go bone gore go ka dirwa jang go rarabolola kgang e.

Maloko a mangwe a lekoko leo a akaretsa Kgosi Phokontsi Seeletso wa Mmadinare, mothusa mokwaledi wa ditsamaiso tsa selegae Rre Molefi Keaja, motshwarelela mogolwane wa lephata la makgotla a Setswana Rre Tumelo Seboko, Rre Nametso Mothoka go tswa kwa lephateng la melao mogolo (attorney general) le mothusa tona wa temo thuo Rre Oreeditse Molebatsi.

Tona Siele a re Tautona Khama o mo romile go rola lekoko le morago ga gore barongwa gotswa mo morafeng wa Bakgatla ba etele ofisi ya gagwe go kopa tlharabololo ya bogosi jwa bone.

A re le ntswa ene a kopane le lekoko leo la Bakgatla, bangwe le bone ba ne ba setse ba kile batla kwa go ene mme seo sa patika gore go dirwe lekoko leo bogolo jang ka barongwa o kare ga ba welane sentle mo megopolong ya bone gore tsela pedi ba tsaya efe.

Rre Siele o ne a supa gore ka jalo, tiro kgolo ya lekoko leo ke go ikopanya le morafe wa Bakgatla go tsaya megopolo mo go bone mme morago batla dira pego e batla e rolelang tautona mme puso e tla sekaseka megopolo eo mme ditshwetso di ka dirwa morago ga seo.

O ne a kopa morafe go dirisana sentle le lekoko leo ka jaana le beile mo go bone go arogana megopolo gore tsotlhe tse di amang bogosi di rarabololwe.

Tona Siele o ne a gape a kopa Bakgatla go tsaya kgang e ka manontlhotlho ka jaana e le masisi e bile e batla batho ba bua ka yone ba wetse maikutlo. A re lekoko leo le tla dira lenaneo la bone la go kopana le morafe ka tsela e ba bonang e kaba thusa go tsaya megopolo mo go bone.

O ne a kopa moeteledipele wa lekoko leo Kgosi Malope II go dirisana le baemedi ba Bakgatla ba ba eteletsweng pele ke Rre Moagi Molebatsi.

E rile a ba ema ka lefoko, modulasetilo wa lekoko leo Kgosi Malope II o ne a bolelela Bakgatla gore tiro kgolo ya bone ke go tsaya megopolo mo morafeng otlhe ka kakaretso mme morago ba dira pego e e nang le dikgakololo tse morafe o eletsang di ka dirwa go fetsa kgang ya bone.

A re ka jalo go botlhokwa gore go nne le tirisano mmogo fa ba kopana le bone ka seo se tla thusa puso go tsaya tshwetso e e maleba e bile e na le bokaedi.

Kgosi Mothibe Linchwe o ne a kopa morafe gore o letlelele lekoko leo go dira tiro ya lone ka le romilwe ke tautona mme e bile go supa fa puso e ikaeletse go bona tlharabololo ya dikgang tsa bogosi jwa Bakgatla. Bokhutlo