21 Sep 2014

Lerole le ne le beta mokoduwe fa Bakgatla kwa motseng wa Bokaa ba ne ba phuthegile go isa dikgafela kwa kgotleng ya bone ka Labone.

E rile a ba amogela mo kgotleng, kgosi ya motseng oo Rre Sue Mosinyi o ne a leboga balemi ba motse wa gagwe go bo ba bone go le maleba go tsisa dikgafela mo kgotleng, a tlhalosa fa seo e le ngwao e bile e le tsela ya go leboga Modimo ka thobo e ba e boneng monongwaga.

Kgosi Mosinyi a re se gape ke tsela nngwe ya go tsosolosa ngwao ya bone le go tiisa balemi moko.

O ne a supa fa keletso ya bone ele go tsisa dikgafela ngwaga le ngwaga mo kgotleng mme ka jalo a rotloetsa morafe wa gagwe go ema ka dinao go bereka ba le seopo sengwe gore tiro ya go nna jalo e atlege. A re ba tshwanetse go neelana kitso eo le bana ba ba sa ntseng ba gola gore le bone ba gole ba na le kitso ya gore dikgafela ke eng e bile go dirwa eng ka nako eo.

Fa a tswa la gagwe modulasetilo wa komiti ya balemi, Rre Samuel Mochailo, o ne a tlhalosa fa go setse go le digwaga di le dintsi ba sa tsise dikgafela mo kgotleng, a tlhalosa fa ngwaga ono ba bone gore ba ikiteye ka thupana. A re seo ke go supa ngwao ya bone, mme a kopa balemi go tswelela ka moono oo, a kaya fa o le molemo fela thata.

Le fa go ntse jalo, o ne a bua a sa kgwe mathe ka borre bangwe ba a tlhalositseng fa ba le maoto a tshupa go tsenelela mediro e e tshwanang le wa dikgafela.

A re bontsi jwa mediro, bomme ke bone ba ba di gogang kwa pele, a bua jalo a kgothatsa borre go iketsha kwa morago. Balemi le bone ba ne ba fa bopaki ka thobo ya bone le gone go neela ba bangwe maele a k aba thusa go roba botoka mo masimong a bone.

E ne ya re a fa bopaki, Rre Moses Mantsi yo o tlhalositseng fa a lema kwa Sekgwa-sentsho o ne a tlhalosa fa temo jaaka dikgwebo tse dingwe, e tlhoka bopelotelele, a tlatsa ka gore o ne a lema dingwaga tse di fetileng mme o ne a sa robe sepe mme seo sa seka sa mo kgoba marapo.

O ne a tlhalosa fa ngwaga ono a ne a lema dihekere di le thataro mme o kgonne go bona dikgetsi tsa mmidi di le masome a marataro, a tlatsa ka gore o kgonne le go bona thobo ya magapu, ditloo le manoko tota.

O ne a kopa balemi ba bangwe go tlhokomela masimo a bone morago ga temo, a tlhalosa fa a lemogile gore bontsi jwa bone morago ga go baya ditema ba ya go nna kwa magaeng, a supa fa temo e tlhoka lorato le tlhokomelo.

O ne gape a supa fa puso ya lefatshe leno e thusa ka dipeo le go ba lemela, ba sa lopiwe madi ape, se a tlhalositseng fa e le maiteko a mantle mme a ba rotloetsa go ema ka dinao go dirisa sebaka seo.

Rre Mantsi o ne gape a leboga molemisi wa motse wa Bokaa, a re o dira tiro ya gagwe ka bokgabane. A re fa ene e se ka thotloetso ya gagwe, ba ka bo ba sa bona thobo e ba e boneng eo mme le fa go ntse jalo, o ne a mo kopa go ba phakisa dipeo ka bonako gore ba leme nako a sa ntse e le teng.

Lizzy Moitlobo ene o ne a kopa gore mo nakong e e tlang fa go dirwa tiro eo go lalediwe bana ba dikole go tla go bona gore go dirwa eng, ka bontsi jwa bone ba sa itse.

O ne a supa fa bogologolo dikgafela di ne di isiwa kwa go kgosikgolo, a kaya fa morago ga moo di tlaabo di kgaogangwa ka dikgotla tsa bone gore bangwe le bangwe ba nne le tsa bone. BOKHUTLO