21 Sep 2014

Mogwebi wa monana wa motse wa Shoshong , mo kgaolong ya Mahalapye o galaleditse lenaneo la dithuso la madi a banana go mo rotloetsa ka madi go ipulela madirelo kapei ya borotho a beikhara, e a reng e bogadi bo gaufi.

Fa a bua mo potsolotsong le BOPA Mme Keletso Mokongwa, wa dingwaga tse di masome a mararo le boraro are o simolotse kgwebo ya gagwe monongwaga ka kgwedi ya herikgong e ya fifing. O tlhalositse fa lorato la gagwe la kapei e le lone le mo sosoeditseng go kgetlha kgwebo ya motlhale o

Mme Mokongwa a re ga a ise a ye sekolong go ya go dira tsa kapei mme o kaile fa thuto yotlhe ya go apaya a e tsere kwa lwapeng mo ntlong ya boapeelo, a tlatsa ka go tlhalosa fa a na le tumelo ya gore motho wa mme o tshwanelwa ke go tlhaloganya ka tsa kapei ka e le tlholego.

Are o na le lorato le le tseneletseng mo go leketseng metlhale e e farologaneng ya kapei, ke ka moo a boneng go tshwanela gore a kgethe kapei ya borotho ka mo go haphegileng. Ka jalo o dira marotho ka mefuta e e farologanyeng ya one.

O kaile fa beikhara ya gagwe e e bidiwang ka leina la Mols Bakery and confectionary,  e kgona go dira dipoelo se se gwetlhiwang ke  lefelo, ka e itlhomile fag are ga marakanelo a ditsela, ka jalo are ba kgona go bona theko le mo bafeting ka tsela ba ba dirisang tsela e e yang serowe, ka are e a re ba le mo mosepeleng ba kgone go feta ba tsena ka madirelo a gagwe go reka borotho ja mopako.

Mme Mokongwa o ipelafaditse ka dipoelo are le ntswa go na le dikgwetlho mo kgwebong o kgona go dira go lekane go ka tshegetsa le go ka tsweleldisa kgwebo ya gagwe gammogo le go duela badiri ba gagwe ba bararo.

Are kgwetlho e tona e e ba lebaganeng mo kgwebong ke letlhoko la koloi e ba ka bong ba e dirisa go tsamaya ba isetsa bareki ba bone ebong mabentlele le dimausu borotho ka yone, ka jalo a re se se ngotla dipoelo tsa bone ka ba felela ba rekisetse mo beikhareng le gone ba rekisetsa batho fela ba ba mo tikologong ya madirelo a bone.

O tsweletse ka go tlhalosa fa kgwetlho e e ba lebaneng e le ya go reka didirisiwa tse ba di dirisang mo kapeing ya marotho a a hapheging le dikuku kgakala tse a tlhalositseng fa ba di reka kwa Gaborone le Francistown mo diholosaileng ka a tlhalosa fa go reka mo marekisetsong a mo gae go le turu.

Are ba lebanwe gape ke phadisanyo go tswa mo marekisetsong a matona a a itshetetseng a choopies, ba areng ba rekisa ka tlhwatlhwa tse di kwa tlase ga tsa bone  e bile ba apeela bontsing.

Mme Mokongwa are erelentswa go ntse jalo o na le maikaelelo a gore ere mo ngwageng tse tlhano tse di tlang kgwebo ya gagwe e bo e godile, e tlhatlogile go nna lefelo le ekareng motho a batla marotho othe ka mefuta le dimonanmone a di fitlhele, go na le koloi e e isang borotho ebile ele mo seeming sa go ka phadisanya le madirelo a thwathwa a tshwana le Sweets from heaven. BOKHUTLO