17 Sep 2014

Makgolokgolo a banni ba Mahalapye ba tlhotse ba thologetse mo kgotleng kgolo ya motse wa bone go simolodisa merapelo ya pula le go lebogela thobo ya ngwaga wa 2013/14.

Phuthego eo, e neng e rulagantswe ke komiti e bopilweng ka magosi,baruti ba dikereke,balemi/barui le badirelapuso, maikaelelo a yone ene ele go tsosolosa ngwao,go rapelela pula le go lebogela thobo ya ngwaga o fetileng ka jaana bontsi jwa Batswana ba kgonne go bona se ba ka itshetsang ka sone.

E rile kgosi Duncan Tsoebebe Segotsi a amogela morafe wa gagwe mo kgotleng a ba lebogela go tsena phutlhego eo ka dipalo tse dintsi segolo jang balatedi ba diphuthego tse di farologaneng tsa dikereke gammogo le badirelapuso ba ba neng ba akaretsa ba sepodise sa Botswana, badiri ba dikgolegelo, ba makgotla a Setswana le ba lephata la tepo lowapi.

A re ere ka Batswana ba tswa goo-lowe ba beile matshelo a bone mo ditlhapelong e bile ba ikaegile ka temo-thuo, ke sone se ba boneng gole botlhokwa ele magosi go bitsa phutlhego ya gonna jalo go tla go abelana megopolo le setshaba ka ditsela tse di ka dirisiwang go tsosolosa ngwao le go simolodisa merapelo ya pula gammogo le go ipaakanyetsa go bolotsa letsema kgwedi e tlang e tlhola malatsi ale matlhano.

Kgosi Segotsi o kopile morafe wa gagwe go mo inela diatla metsing ka dingwe tse a katswang a di dira ka tshokamo ntleng le go rerisana le morafe, mme a bolela fa batsadi ba tshwanetse go thusana le mapodise,magosi le ba lephata la boipelego go kgalemelela banana go inaakanya le ditiro tse di ka ba gogelang mo tlhaelong jaaka borukutlhi,gonwa majalwa le go ima ba sale bannye ka seo se ka ba bakela malwetse a tlhakanelo dikobo a tshwana mogare wa HIV le bolwetse jwa AIDS.

Mothusa kgosi ya motse wa Mahalapye Rre Tshipe Tshipe o tlhalositse fa maloko a Ntlo ya Dikgosi ba dirile melao e tla dirisiwang go tseela beng ba dikgomo tse di senyang mo masimo dikgatlo,mme a bolela fa melawana eo e neetswe tona wa lephata la dikgaolo le tlhabololo magae Rre Peter Siele go e sekaseka pele ga e ka dirisiwa.

Kgosi Thipe o boleletse batho ba ba neng ba tsene phuthego eo fa mmuso o tlhokisiwa boroko ke dikgomo tse di senyang dijwalo mo masimo ntswa mmuso o dirisa di dikadike tsa madi go lemela Batswana ka lenaneo la ISPAAD ngwaga le ngwaga, mme a bolela fa melawana eo e tla gagamatsa diphogwana barui ba ba sa tlhokomeleng loruo la bone.

O tsweletse ka go tlhalosa fa maikaelelo a komiti ya gagwe gammogo le ba bogosi ele go rotloetsa morafe wa Mahalapye go tsosolosa ngwao ka go tshwara mekete ya go ipelela thobo ngwaga le ngwaga le go tlhotlheletsa batho go tsena diphuthego tsa go bolotswa ga letsema ka mmetela.

Kgosi Tshipe o tlhalositse fa Mmuso o dumelane mogopolo wa go tlhatlosa dikatholo tsa makgotla a Setswana jaaka go oketsa dithupa tse di pegwang badira melato,go oketsa dikatholo tsa madi le kgolegelo go leka go bepisa seemo sa borukuthi jo bo dirwang ke Batswana segolo jang banana ba dingwaga tse di kwa tlase ga masome a mane(40).

Mo phuthegong eo, e neng e tletse boitumelo ka ntlha ya dihela tse di neng di tswa mo dikerekeng tse di farologaneng, morafe one wa akgolela baeteledipele ba motse gotswa ka megopolo ya go tsosolosa ngwao, go rapelela pula,go bolotswa ga letsema gammogo le go itumelela thobo ya paka e fetileng. Bokhutlo