17 Sep 2014

Go bolelwa  fa lenaneo la temo thuo la LIMID le ntsha maduo kwa kgaolong ya Kgalagadi.

Fa a bula khansele potlana ya Tsabong ka Labobedi, modulasetilo, Rre Sam Brooks o boletse fa dipalo tsa baikopedi ba lenaneo leo di ile kwa godimo mme dikopo di isitswe kwa maphateng a a maleba go sekasekwa.

A re mo dikopong di feta makgolo a mabedi le masome a matlhano, tse di fetang lekgolo le masome a supa di amogetswe, mme tse di masome a supa le borataro di sa amogelwa fa tse thataro di santse di sekasekwa.

Rre Brooks o boleletse khansele gore baikopedi ba le masome a supa le borataro ba setse ba filwe dihutshane kwa kgaolong ya Boravast fa ba le lesome le boraro ba di filwe kwa metseng ya Werda le Makopong.

O kopile makhanselara go bua le ba ba thusitsweng ka lenaneo le gore ba tlhokomelo dihutshane tse ba di filweng ka jaana di ka tlhabolola matshelo a bone go ya go ileng. A re fa ba ka tlhokomela dihutshane tseo, ga gona jaaka ba ka palelwa ke go ikinola mo lehumeng le go tlhabolola matshelo a bone.

Mo go tse dingwe, o supile fa ditshekatsheko tsa go ikopela lenaneo le le faphegileng la ISPAAD di weditswe mo kgaolong eo. O tlhalositse fa metse e e mo kgaolong e kgaogantswe gararo e bile le bodiredi bo ka tshwara botlhano bo setse bo le teng mo motseng mongwe le mongwe. A re go setse go amogetswe dikopo di feta makgolo a robabongwe tsa lenaneo leo mme tsholofelo ke gore dipalo tseo di oketsege mo tsamaong ya nako.

Fa ba mokgwa kgaba, makhanselara a supile fa ba itumelela go bo go setse go na le tema mo lenaneong leo. Mokhanselara wa motse wa Werda, Mme Bakae Mathule o kopile gore go tswelele go sekasekwe baikopedi ka jaana ba bangwe ba ba tlhokang lenaneo leo thata ba ne ba seka ba kgona go kopana le bodiredi ka mabaka a a farologaneng a akaretsa bolwetse.

O tsweletse ka gore fa baikopedi ba sena go thusiwa ba bewe leitlho mme e bile ba rutiwe botlhokwa jwa go somarela dithuso tseo.

A re go ngomola pelo gore batho bangwe ba tseye mananeo mme ere morago ba bo ba sa  a tlhokomele ba tlhalosa fa ba sa senyegelwa ke sepe. BOKHUTLO