14 Sep 2014

Banni ba Metsibotlhoko mo kgaolong potlana ya Letlhakeng ba tlhalositse fa ba akola ditlhabololo ka lenaneo la Ipelegeng.

Mo potsolotsong le BOPA bosheng, mongwe wa maloko a komiti ya ditlhabololo tsa motse oo, Mme Kelennetse Moatshing o kaile fa ba agile leobo la kgotla ya motse ka lenaneo la Ipelegeng mme mo nakong eno ba aga matlwana a boitiketso a le mabedi, e nngwe kwa mabitleng fa e nngwe e le kwa sekoleng gammogo le ofisi ya kgotla. 

O tsweletse a bolela fa ba katolola matamo e ntse e le ka lenaneo la Ipelegeng.

Mme Moatshing o supile fa Ipelegeng e le yone e go itshetswang ka yone kwa Metsibotlhoko ka e le motsana o o senang ditiro tse dintsi. 

A re komiti ya bone e tsenya madi ka go hirisa matlo a a lesome a ba nang le one. 

O tlhalositse fa a itumeletse tshwetso ya khansele ya gore beng gae ba fiwe ditiro di akaretsa go apeela bana ba sekole borotho. BOKHUTLO