14 Sep 2014

Go bolelwa fa go bala le go kwala go tshwanetse ga tsewa ka tlhoafalo gore baithuti ba tle ba kgone go dira sentle mo dithutong tsa bone.

E rile a  amogela baeng kwa letsatsing la go ipelela go bala le go kwala bosheng, mothusa kgosi ya Balete, Kgosi Tsimane Mokgosi  a tlhalosa fa ba lephata la thuto ba tlhabolola ditalente tse baithuti ba nang le tsone ka jalo go le botlhokwa go le aramela le sa ba tlhabetse.

Kgosi Mokgosi a re mo malatsing ano go dirisiwa maranyane thata gongwe le gongwe mme go nna motlhofo go a tshwara fa motho a na le lesedi la thuto.  

O tlhalositse fa mongwe le mongwe a na le tshwanelo ya go ithuta, a bo a leboga bana ba ba sa kgonang go ya sekoleng go bo ba inaakantse le thuto ga e golelwe, ka e sa ba kgoreletse go ithuta tiro  ya diatla.

Mopalamente wa pele wa kgaolo ya Borwa Botlhaba, Rre Odirile Motlhale, o tlhalositse fa thuto ya motho e bonwa ka ditiro e seng ditlankana. 

O boletse  fa  lekgotla la United Nations le supa fa palo ya batho ba ba itseng go bala le go kwala mo lefatsheng leno e le 85 per cent, fa lefatshe la Aferika Borwa lone le le kwa pele ka 92 per cent.

Rre Motlhale o boletse fa thuto e tshwanetse go thusa motho go itlhabolola, go mo tsenyetsa madi, go mo kgontsha go ipuelela a sa tshabe sepe gammogo le go tlhaloganya dilo botoka. 

O boletse fa ngogola baithuti ba le masome a mabedi le bobedi ba pasitse lekwalo la bosupa mo kgaolong ya Borwa Botlhaba, mme ba robabongwe ba tsweledisitse dithuto le lephata la BOCODOL. 

A re monongwaga baithuti ba le masome a mararo le boraro ba tlaa bo ba kwala ditlhatlhobo tsa lekwalo la bosupa.

Mogolwane go tswa kwa lephateng la thuto, Rre Benson Rauwe o tlhalositse fa Ga-e-Golelwe e e fa dikitso ka jaana le fa go tlhagogile malwetse baithuti ba kgona go tlhaloganya fa go buiwa ka one. 

Le fa go ntse jalo, a re ba ketefalelwa ke tiro ka baruta-bagolo ba tsena ba tswa, jalo o bona go le botoka gore  ba ka thapiwa ka konteraka.  BOKHUTLO