09 Sep 2014

Banana ba le bantsi ba supa fa lenaneo la Tirelo Setshaba le farologane thata le la Ipelegeng.

Mo potsolotsong bosheng, Mme Kebalebile Mboroma yo o dirang mo lenaneo leo, o supile fa a dirile thata mo Ipelegeng mme a ise a nne le kitso e e tshwanang le a e bonang mo Tirelo Setshaba.

Mme Mboroma o tlhalositse fa Ipelegeng e thusa fela ka madi le gone go leka go tlhabolola metse ya magae mme e sa thuse ka kitso e e ka reng mo isagong motho a  kgona go dira sengwe ka yone. 

A re Tirelo Setshaba yone e pharologano fela thata ka e kgona go fa monana kitso e e tletseng ka tiro e a e dirang ka gore nako tsotlhe ba a bo ba thusa batho ba ba farologaneng e bile ba dirisa diofisi tsa puso.

A re Tirelo Setshaba e neela motho seriti ka gore ba nna ba le phepha nako tsotlhe e bile ba kgona go lemoga gammogo le go tlhaloganya dilo tse dintsi tse di diragalang mo lefatsheng. 

O tsweletse a tlhalosa fa lenaneo leo le fa monana sebaka sa go ithuta, go dirisa le go akola meamuso ya puso jaaka maranyane a inthanete le dibalamakgolo ka ba bo ba le mo diofising.

O tsweletse a supa fa lenaneo le, ele la maemo a kwa godimo fela thata, a tlatsa ka gore le tlhoka nako le tshekatsheko e e tseneletseng go tlhabolola banana le go ba tlhamela ditiro tsa sennela ruri. Le fa ntswa a leboga puso ka go ts

isa lenaneo leo ka banana ba kgaolo ya gagwe ba le itumeletse e bile ba dira ka bokgabane go leka go le sireletsa, o boletse fa mathata ele go ba duela morago ga nako gonne a re ba kgona go nna kgwedi tse tharo ba sa bone dituelo tsa bone mme seo se ba kgoba marapo fela thata. BOKHUTLO