21 Aug 2014

Banana ba kgothaditswe go tsaya mananeo a puso ka tlhwaafalo gore ba kgone go intsha mo lehumeng le mo nakong eno e leng kgwetlho mo go  bone lefatshe ka bophara.

Fa a bua kwa bokopanong jwa banana kwa Palapye bosheng, rakonteraka e e agang maemelo a dipalamo kwa motseng oo ya Modi Construction, Rre Batsetswe Masisi a re lehuma ke kgwetlho e e ka nyeletsang lefatshe fa e sa lwantshiwe ka tlhwaafalo ka le dira gore banana ba ineele mo dilong tse di borai jaaka  tlhakanelo dikobo e e sa sireletsegang le bogodu.

A re le fa ba ka amiwa ke lehuma ba seka ba itlhoboga ba leke go le lwantsha bogolo jang ka gore puso e ba lekela bojotlhe go ba direla mananeo a ba ka a  dirisang go tlhama ditiro le go thusa ba  bangwe. 

O supile fa kompone ya gagwe e thusa thata mo go thapeng banana, e re morago e tlhophe ba ba dirang ka natla e ba ise dikoleng go ya go ithutela ditiro tse ba  eletsang go di dira.

Rre Masisi a re le ene o tlaa tsaya kgato mo go tsamaeng a gakolola boradikonteraka  ba bangwe  go tlhoafalela thuto ya go dirisa sekausu le gore ba di abele  babereki ba bone ka dinako tsotlhe. 

O kopile bodiredi ja dikonteraka go itlhatlhobela mogare wa HIV/AIDS gore ba nne ba  itse seemo sa bone dinako tsotlhe.

O lebogile banana ba Palapye go bo ba tsweletse le lenaneo la itshidilo mmele a supa fa le le botlhokwa thata mo botsogong jwa bone.

 Monana wa moithaopi, Mme Gogontlejang Phaladi o kgothaditse banana ka ene  go  sireletsa seriti sa bone sa bonana ka go ithuta go dirisa mafoko a a tshwanetseng fa ba bua le bagolo le go apara diaparo  tse di sa fatlheng. 

O tsweletse a tlhalosa fa boitsholo le dilo tsa sesha gammogo le botsala di bolaya boleng jwa banana ka go ba ntsha mo tseleng. 

A re  ba tshwanetse ba itsheka tsheka  gore a ditsela tse ba di itlhophetseng tsa botshelo e tla a re isago di ba ise golo gongwe kana di ba gogela mo bosuleng.   

 Mme Phaladi  a re monana yo o tsogang a na le bokamoso jo bo tlhapileng  o itshupa ka ditiro fa a sale monnye gonne gole gantsi o gola e le motho yo o  ditlhong a na le tlotlo, maitseo le setho sa gagwe e le se se eletsegang mo matlhong a setshaba.

O tlhaloseditse banana gore tiro ya go ithaopa e mosola thata ka gore Modimo oa go tsholetsa a go isa kwa mankalenkaleng ka gobo o dira tiro ya bopelotlhomogi. 

O tsweletse a supa fa seo e le tiro e e seng motlhofo fa o simolola go e dira ka gore go nna le ba ba nyatsang e bile ba kgala mme fa o dira ka lorato ga o ka ke wa kgobega marapo 

Mogokaganyi  wa lenaneo la twantsho bolwetse ja HIV/AIDS,  Rre Calliscul  Jakalas  o tlhalositse fa   dipalo tsa mogare  di ya kwa tlase le kwa godimo mo mafelong ka go farologana ka jalo go supa gore maikaelelo a puso a gore ka 2016 lefatshe leno le bo le itekanetse a tlaa folotsa. BOKHUTLO