11 Aug 2014

Banni ba Kajaja ba itumeletse ditlhabololo tse motse wa bone o di akotseng di akaretsa kokelwana, sekole le leobo la kgotla.

Fa a bua mo potsolotsong bosheng, Kgosi Molathegi Siana a re  le fa ntswa motse oo o sa le o tlhomamisiwa ka 2007, go ne go sena sepe sa ditlhabololo mo go one.

A re ditlamelo di tshwana le dikole, tsa botsogo le gone go tlhomamisa meriti ya ditlankana ba ne ba di dira mo metseng e mabapi ya Etsha le Shakawe. Kgosi  a re motse o, o na le banni  ba feta makgolo a supa ba ba ikaegileng thata ka temo thuo.

O tsweletse a supa fa merafe e e fitlhelwang mo motseng o ele  ya Bambukushu le Bayei. 

A re banni ba ile ba bona sebaka sa go itela mo go tautona  fa a ntse a le mo letsholong la go etela Batswana mo metseng ya bone ka letlhoko la sekole,  kokelo,  leobo la kgotla,  motlakase le sekonotere se se tsenang mo motseng wa bone.

Kgosi a re tautona o ile a ba solofetsa sekole, kokelwana le kgotla mme e bile sekole se setse se le mo tirisong.

A re kokelwana ga e ise e fele mme e teng le kgotla e re ntswa e ise e bulwe semmuso, ba setse ba na le setempe se se ka ba thusang fa ba batla go tlhomamisa meriti ya ditlankana tsa bone.

O tlhalositse gore le fa ntswa ba ne ba kopile motlakase le sekonotere, ba  tlhaloganya letlhoko la puso la madi ka jalo ba tla  di emela ka pelo e telele.

Bogogi jwa sekole bo supile fa sekole se butswe e bile ba amogetse baithuti ba le masome a mane le boferabongwe go simolola ka  lekwalo la ntlha go fitlha kwa go la boraro.

Mothusa mogokgo wa sekole seo, Mme Ntshang Gabonnwe a re baithuti ba dira sentle fela thata e bile batsadi ba itumeletse gore bana ba bone ga ba sa tlhole  ba latela dikole kwa metseng e sele ba nna le masika, a tlhalosa fa  mo nakong eno batsadi ba  kgona go itlhokomelela bana ba bone.

Mme Gabonnwe a re ba setse ba na le matlwana a borutelo a le mararo, mme  mo go one e le nngwe  e agilwe ke botsadi jwa motse ka letlhaka. Bokhutlo