07 Aug 2014

Mothusa tautona, Dr Ponatshego Kedikilwe a re o leboga mabutswapele a Domkrag go bo ba ba tlogeletse  lesedi, tsholofelo le botlhale jo gompieno balatedi ba phathi eo ba bo jang.

Fa a supa ntlhopheng wa bopalamente le makhanselara ba kgaolo ya Mogoditshane ka  Matlhatso, Dr Kedikilwe o boletse fa boswa jo bo akaretsa thulaganyo e mo go yone ba dumalaneng gore mahumo otlhe a lefatshe leno ka go farologana a akolwe ke Batswana botlhe ka go lekalekana. 

Mothusa tautona o boletse fa seo ele one motlhala wa tsamaiso ya puso e phathi ya Domkrag e tla tswelelang e o sala morago e bile  a re  lefatshe leno le  fa leleng teng ka ntlha ya thulaganyo eo.Mothusa tautona a re o dumela gore fa Madomi a santse a sala maitlamo a phathi morago,  ba tla tlhopha Rre Patrick Masimolole go boela palamenteng le makhanselara a gagwe.

O bile a kaya gore ere ntswa phathi ya BDP e kgalelwa mananeo a yone, puso e  naya Batswana ditshetsa matshelo di tshwana diritibatsi tsa bolwetse jwa AIDS  , dipeo le dichefi mahala e bile gape e tlhokomela masiela le batlhoki.

A re fa puso e  ne e ka  seka ya thusa ka mananeo a tshwana le Ipelegeng, nyeletso lehuma le a mangwe ,  o ipotsa gore go ne go ka bo go tshelwa jang mo nakong eno.

O tsweletse a re puso e tsweletse ka go sega tema ka ba tshwere ka go batlela banana diphatlha tsa mebereko.

O boletse gore selo se Batswana ba tshwanetseng ba ipelafatsa ka sone ke ditumelo tse di letlelesegang mo lefatsheng leno, poifo Modimo le gone gore motho mo lefatsheng leno o a tlhomphiwa.

Sebui se sengwe, Rre Kabo Morwaeng, o kgothaditse batlhophi go busetsa phathi ya Domi mo pusong mme a gatelela gore go tlhophele phathi ya ga abo motlhala o montle o o papametseng fa go lebilwe ditiro tse e di diretseng lefatshe, segolo bogolo mo pusong ya batho ka batho.

A re BDP e kgonne go sireletsa puso ya batho ka batho le molao motheo fa go tshwantshanngwa le mafatshe a mangwe a lefatshe leno le tsereng boipuso le one mo kgaolong ya Aferika.

O tsweletse a re mafatshe ao, one a setse a fetotse melao metheo ya one mme lefatshe leno lone ga  le a dira jalo ka Motswana mongwe le mongwe a gololesegile go itlhophela phathi ya pelo ya gagwe.

A re se, se dirile gore mafatshe a mangwe a meletse lefatshe leno mathe ka go rena kagiso le thokgamo.

Fa a tswa la gagwe Dr. Rev. John Seakgosing o supile fa Batswana ba batla puso e e netameng eseng e e lekelediwang.

A re phathi ya ga abo e tsaya tlhopho ya Batswana ka tlhoafalo, ke sone se se dirileng gore Batswana le bone ba e tseye jalo, sebe sa phiri ke kwelo tlase ya itsholelo e e amileng ditlhabololo mme a tlhalosa gore ntle le yone, phathi ya gagwe e kabo e dirile go tlala ka diatla mo mohameng wa ditlhabololo.

Le fa go ntse jalo, a re ba ikanne gore ga gona Motswana yo o tla welang mo isong le fa ditlhabololo di ka ema.

O kopile batlhophi go tshwara boOmang le dikarata tsa bone tsa go tlhopha sentle ka go utlwala fa go na le bangwe ba ba di ba amogang.

Fa a latlhela la gagwe, ntlhopheng wa bopalamente mo kgaolong, Rre Patrick Masimolole o boleletse batlhophi gore ipapatso ya bone ke e e rekisang maitlamo le mananeo a phathi fela eseng sepe gape.

O boletse fa a diretse kgaolo ya Mogoditshane ditlhabololo di le dintsi di tshwana le tsela e tona e e ralalang motse le go emisa go thubelwa matlo ga batho ba kgaolo.

A re mo nakong eno bana ba batho ba ba tseetsweng masimo ba bone ditsha, mme o boletse fa tseo ele dingwe tse di supang motlhala wa gagwe ka jalo a kopa gore batlhophi ba mmusetsa gape kwa palamenteng. BOKHUTLO