31 Jul 2014

Puso e rotloetsa temo ya merogo le maungo ka ditsela tse di farologaneng go godisa mhama oo le go fokotsa go tsaya dijo kwa mafatsheng a mangwe.

Fa a bua kwa phuthegong ya bagwebi ba temo ya merogo le maungo ka Labobedi, tona wa temo-thuo, Rre Christian De Graaff a re lenaneo la ISPAAD le diretswe go rotloetsa temo eo.

O ne a tlatsa ka go re le dipatlisiso di setse di dirilwe  go tshegetsa mhama oo. Rre De Graaff a re temo e e pataganetswe ke dikompone tse di farologaneng di akaretsa dibanka, Citizen Entrepreneural Development Agency, Youth Development Fund le National Development Bank.

A re maduo a setse a bonala gonne ka 2013/2014 temo ya merogo le maungo e godile ka go lemilwe  dithane di le 5 000 go fetisa ngogola.

O rotloeditse balemi go oketsa temo le boleng jwa dijalo ka go sala morago dielo tse di beilweng. O kgothatsa balemi go dira lenaneo le le tlaa dirang gore ba kgone go ntsha dijo ngwaga le ngwaga.

A re go nna le temo e ntsi go dira gore ditlhwatlhwa tsa merogo di ye kwa tlase, jalo a rotloetsa balemi go lema dijalo tse di tshwanang le ditamati le ditapole ka di na le mmaraka o o kwa godimo.

A re le fa bagwebi ba reka merogo le maungo, balemi ba bantsi ba ngongoregela ditlhwatlhwa tse di kwa tlase tse ba  di duelang.

O tlhalositse fa puso e se mo seemong sa go laola seemo seo, a bolela gore  tsela nngwe e ba  tokafatsang bokgoni jwa go buisana le bagwebi ke jaaka ba fetola Botswana Horticulture Market  gore e nne yone e rekisetsang bagwebi le baji bareki maungo le merogo.

A re puso e rotloetsa dithoto tse di dirwang mo gae, jalo ba kgothatsa baji-bareki go reka maungo le merogo ya mo gae fa e le gore boleng le ditlhwatlhwa tsa teng di siame.

Fa a bua ka kgang ya go laola dithoto tse di tswang kwa ntle ga lefatshe leno, tona a re ba lebanwe ke dikgwetlho di akaretsa go bona gore dithoto tsa mo gae di na le boleng e bile di lekane go lebilwe phetogo ya seemo sa loapi.Bokhutlo