27 Jul 2014

Mme Ledia Marenga yo eleng mosegi wa diaparo kwa Gumare, ke mongwe wa Batswana ba ba akotseng dithuso tsa ba Integrated Field Services, IFS ka1993 mme o santse a ntse a tshwareletse.

Mme Marenga o boletse fa ba IFS ba ne ba mo isa sekoleng kwa Botswana Training Centre e e neng e le kwa Francistown ka nako eo, sebaka sa ngwaga tse pedi go ya go ithutela go sega diaparo, mme ya re morago ba mo thusa ka madi go simolola kgwebo.

A re le fa ntswa  a simolotse go sega diaparo kwa lwapeng  ka motshine o  le mongwe, kgwebo ya gagwe e godile fela thata ka mo nakong eno o kgonne go reka metshini e e rokang e le mene a bo a thapa badiri ba le babedi.

Mme Marenga a re o ne a fiwa setsha ke ba kabo ditsha mme a se tlhabolola  ka thuso ya ba IFS, jalo o kgonne le go hirisetsa batho dikamore tse dingwe.  O tlhalositse fa maikaelelo magolo a gagwe ele go busetsa kwa pusong ka le ene e mo thusitse fela thata.

 O kgadile fela thata bagwebi ba ba tlogelang dikgwebo tsa bone di nna leswe, a bolela fa go dira jalo go ka koba bareki  e bile go isa kgwebo kwa tlase ka jalo o rotloeditse bagwebi ka ene go nna le  boineelo gore ba tswelela pele.

O tsweletse a gakolola bagwebi gore ga ba a tshwanela go kopanya kgwebo le marato kgotsa ditsala, mme a ba rotloetsa  go nna pelotelele mo kgwebong gore e tle e ntshe maduo le gone go tlhama mebereko.

Moroki yoo, o rotloeditse segolo bogolo bana ba basetsana go tsenelela mananeo a puso. BOKHUTLO