17 Jul 2014

Go bolelwa fa go le botlhokwa gore fa komiti ya ditlhabololo tsa motse e tsaya marapo, e lebelele gore e ya go bereka jang e le setlhopha segolo bogolo ka maloko a farologana ka megopolo.

Se, se boletswe ke mogolwane go tswa mo ofising ya boipelego kwa Ramotswa, Rre John Sephobe, kwa thuto puisanong e go neng go tlhatlhelelwa maloko a komiti ya VDC ka tsamaiso ya  komiti eo le go tshwara  dibuka le madi.

Rre Sephobe o tlhaloseditse  maloko ao gore ga ba kake ba ya gope fa ba sa bereke e le setlhopha, ka maikaelelo a le mangwe  a go tsisa  ditlhabololo   mo motseng. 

O  ba gakolotse gore ba tlhaloganye fa ba tla ka dikitso tse di farologaneng,  ka jalo ba ka di kopanya  gore di ba ise   kwa   moonong wa   bone wa go   tlhabolola   motse. Rre    Sephobe o ba gakolotse gape fa neelano le puisano di le botlhokwa mo komiting, a bo a kopa mongwe le mongwe go dira karolo ya gagwe jaaka leloko. 

O tsweletse a tlhalosa gore  go botlhokwa gore moeteledipele wa  VDC  a kgothatse  batho ba a ba eteletseng pele gore ba tle ba bone go nna le tema mo go se ba se dirang. Mogolwane wa ofisi ya Boipelego kwa Taung, Mme Masego Kgomotso, o boletse fa moeteledipele a tshwanetse go tlogela letshwao le le eletsegang le gone go tsepama mo tirong ya gagwe.  O gakolotse maloko ao go tlhaloganya fa ba tlhophilwe ke batho. BOKHUTLO