16 Jul 2014

Mme Nametso Montsho ke monana yo o dingwaga di masome mabedi le botlhano wa kgwebo e e bitswang Pherezia Leather Creations.

O dirisa letlalo go  roka dibeke tsa bomme, ditlhako, dihutshe, mekgabisa ya ditilo le dikgwama.

Monana yo, wa motse wa Lerala mo kgaolong ya Tswapong  a re o lemogile fa a na le bokgoni jwa go roka dibeke tsa bomme a sale mmotlana mme e rile a fetsa lekwalo la botlhano kwa sekoleng se segolwane a lemoga fa a le mo seemong sa go amogana le setshaba mpho ya go roka dibeke tsa bomme e a e filweng ke Modimo.

A re o ne a nna le dikgwetlho fa a fetsa lekwalo la botlhano ka a ne a na le dikakanyo tsa go ithutela dithuto tse di tsamaelanang le se a neng a na le keletso ya go se dira mme mo letlhakoreng le lengwe batsadi ba gagwe ba mo fa kgakololo e sele. 

Mme Montsho a re o ne a reetsa dikgakololo tsa batsadi mme a dira dithuto tsa maranyane a dikhompiutara kwa Limkokwing University of Creative Technology tse a neng a seka a di fetsa ka pelo ya gagwe e ne e sa wela sentle mo go tsone, jalo a ya go ithutela go roka diaparo  kwa Rural Industries Innovation Centre kwa a fetileng a ithuta go suga matlalo le go roka tse di farologaneng ka one. BOKHUTLO