10 Jul 2014

Ba Institute of Health Sciences (IHS)  kwa  Molepolole ba abetse lelwapa la ga Lehupu mo  kgotleng ya Lekgwapheng dimpho ka Mosupologo (07/07/2014) ba sena ba  go ba  etela morago ga go utlwa ka seru se se neng se ba wetse sa dintsho tsa dipolao ka kgwedi ya Motsheganong monongwaga.

E rile a bua mo kabong ya dimpho tseo, Motlhatlhelela dithuto tsa botsogo kwa IHS, Rre Molemisi Maruping a bolela fa  ba ne ba lemoga letlhoko le le kwa godimo la diaparo mo lelwapeng ka e bile bontsi jwa dilwana bone bo fiseditswe mo matlong kwa masimo. 

Rre Maruping a re se, se ne sa dira gore ba batle maano a ba ka thusang boora-Lehupu ka one, mme ba tsaya tshwetso ya gore ba thuse ka diaparo. 

Rre Maruping a re ba ne ba bona go tshwanela gore ba ikanape ba ntshe dilwana, ba bo ba kopa le malwapa a bone go abela lelwapa leo mme ba atlega. 

E rile a tswa la gagwe, malomaagwe boora –Lehupu,  Rre Mokhai Kae, a nesetsa mogopolo wa ba IHS pula. 

O lebogetse dimpho thata a bolela fa go supa gore selelo se ba neng ba se lela ba ne ba se nosi mo go sone. 

“Se se mpontsha gore bana ba ga rakgadi ga ba a latlhega e bile le selelo se re neng re se lela re ne re se nosi  se aname le lefatshe la Botswana ka bophara,” a gatelela. 

O kopile ba IHS go tswelela ka tiro  e ntle  e. Mokhanselara wa kgaolo ya Lephaleng e e akaretsang Lekgwapheng, Rre Rex Motshweneng, o  lebogetse baeteledipele le baithuti ba IHS  go nna pelotlhomogi mo setshabeng.  

A re tiro e ba e dirang mo setshabeng sa Molepolole e bonwa ke mang le mang ka e bile e se lantlha ba abela banni diaparo. 

O boletse fa ba kile ba abela bana ba dikole tse dipotlana diaparo mme a re o lebogela gore mowa wa go aba ga o ba lapise. 

O ba tlhomamiseditse fa Bakwena ba lemoga e bile ba  rata se ba se dirang. BOKHUTLO