07 Jul 2014

Rre Dikgakgamatso Khamfore, ke monana wa dingwaga tse di masome a mararo le bone yo o simolotseng kgwebo ya go phepafatsa mabenkele morago ga go reka teraka ka bontlha bongwe jwa dikatso tsa motsadi wa gagwe tsa go tlogela tiro ka 2009.

A re o simolotse ka go thapa mmereki a le mongwe go mo thusa tiro e a reng o ne a e dira e se ka lorato mme a tlamega ka a ne a tshwanelwa ke go jesa ba lwapa la gagwe.

O boletse gore, “Kgwebo e ne e le boutsana le mmaraka o le kwa tlase, mme le go ntse jalo re ne ra simolola re olela matlakala mo mabenkeleng a mabedi e leng a RJ le Cut Price mo Mahalapye, dituelo di ne di le kwa tlase mme ka lemme le sa bolae, re ne ra itshokela bonyenyane joo.”

Rre Khamfore a re kgwebo e ne ya simolola go gola fa ba ikgapela tiro ya go tsaya matlakala mo go ba Choppies, a supa fa mo nakong eno ba tsaya matlakala mo mabenkeleng a le masome a mabedi , tiro e a tlhalosang fa ba e dira tsatsi le letsatsi.

O tlhalositse gore ba ile ba reka teraka e nngwe ka 2012 gonne tiro e ne e gola. O tsweletse a re ngogola o ne a tsena mo kgwebong ya go rekisa mabokoso le mabotlele e a neng a bona mmaraka wa yone mo go ba Duma Tau mo Gaborone, mme morago a bona mmaraka o o botoka kwa Aferika Borwa mo komponeng ya MPACT.

A re morago ga se, o ne a atolosa madirelo, a batla lefelo le le phuthologileng kwa Flowertown go kgona go bolokela mabotlele le mabokoso teng.

Rre Khamfore o ipelafatsa ka dipoelo tsa go gweba ka matlakala a tlhalosa fa di le bogadi bo gaufi e bile a supa fa a sa latlhegelwe ke sepe ka a tsaya matlakala a mabokoso a a phuthelang mo marekisetsong mahala gonne mo go bone ke  leswe, fa mo go ene e le kgwebo.

A re o kgona go tlamela lelwapa la gagwe ga mmogo le go duela badiri, a bo a kgona le go bolokela isago.

O boletse fa kgwetlho e tona mo kgwebong ele letlhoko la madi a go godisa madirelo, a tlhalosa fa kgwebo e  ka nna tona fela fa ba ka bona madi a go reka metshine e e papaitelang dipampiri, e e thubang mabotlele gammogo le o o kalang.

O tsweletse a re ba lekile go kopa thuso mo lekalaneng la banana mme go retetse, mme mo go tse dintle a bolela fa ba beile tsholofelo ya bone mo go ba CEDA.

A re mathata a mangwe ke ditlhwatlhwa tse di kwa godimo tsa diteraka tse ditona tse di ba isetsang matlakala kwa Aferika Borwa, a tlhalosa gore fa ba ka kgona go reka teraka e tona , ba  ka nna le dipoelo tse di itumedisang le go gaisa.

Rre Khamfore a re maikaelelo a gagwe ke gore mo isagong ba bo ba kgona go tsaya matlakala mo kgaolong yotlhe ya Legare le mo dikoleng tsotlhe tsa Mahalapye.

O bolela fa mo nakong eno a kgonne go thapa banana ba ferabobedi , a tlhalosa fa se, se dirilwe ke gore o lemogile fa banana ba amilwe ke letlhoko la ditiro mme e bile a ikaelela go oketsa babereki fa a ka bona dithuso.

O boletse fa go dira ka matlakala go mo itumedisa ka jaanong ke gone a lemogang fa go sa tsenye dingalo, a tlatsa ka go tlhalosa fa mabokoso le mabotlele ele dithoto tse di motlhofo ka jalo di ka se utlwise koloi botlhoko.

O gwetlhile banana ka ene go ipulela dikgwebo go leka go lwantsha letlhoko la mebereko le go tlhamela ba bangwe ditiro go itsa go ikaega fela ka puso nako tsotlhe. BOKHUTLO