07 Jul 2014

Ofisi ya tsa merero le tsamaiso ya melawana ya khansele ya kgaolo potlana ya Okavango e ikuetse ka banni ba ba tsosang medumo.

Mo potsolotsong le ba BOPA, mookamedi wa ofisi eo Rre Mohumanegi Nnoko o tlhalositse gore ba amogetse dingongorego di le palo e ntsi thata go tsweng ko banning ba Gumare, Shakawe le Nokaneng.

A re ba ngongoregile ba ba supa fa ba tlhodiiwa ke baagisani ba bone mo motseng, mme se se ba itsa go nna ka kutlwano le tlotlano.

Rre Nnoko a re e le ba ofisi ba ile ba tsibogela dingongora tse ka go tsaya letsholo la go dirisa segowagowe ba tsamaya ba itsise banni fa go tsosa medumo e le molato ebile mo godimo ga moo go kgona go senya mowa wa boagisani.

O ne a tswelela ka gore mo dipatlisisong, ba ile ba itemogela gore medumo e ke ya diletso, dikereke, meropa, dikoloi tse di tsamayang di lelela kwa godimo le bangwe batho ba ba kgonang go tsamaya ba opela fela bosigo ba tsosa medumo.

Re na le kgwetlho e tona ka gore Batswana bangwe ba tseela gore fa re tsamaya re ba kopa gore ba ritibatse medumo ya bone ba akanya gore re a ba fufaglela mo menateng ya bone,” ga thalosa Rre Nnoko.

A re bana le kgwetlho ya gore fa ba tswadisa ba ba nang le meleto gore ba phatlalale, ba a gana go ya malwapeng mme ba tla bo ba ikgobokanya mme ba simolola go opela.

Rre Nnoko o ile a supa gore kana Batswana ba ka tswa ba na le tshwanelo ya go letsa mme ba dire jalo ka kitso ya gore tshwanelo ya Motswana mongwe le mongwe e felela fa ya yo mongwe e simologang teng.

A re ebile fa ba na le mediro mengwe e e ka tlhokanang le go letsa diletso, ba tlise dikopo kwa ofising ya bone ebile go ka nna molemo thata fa ba ka buisana le ba ba mabapi ba bone go ba itsese ka se, gore ba dumalane ka mowa wa tirisano mmogo.

O tsweletse ka gore go tsosa medumo ke molato fela o o ka otlhaelwang ebile mo godimo ga moo ba tshegetsa gape le tsone diletso tseo.

Rre Nnoko o weditse ka gore ka ba itse gore metse e ke metse selegae ebile kitso ya banni ga e kalo ka melao, jaanong ba tlile go tswelela ba neneketsa botsadi go fitlhelela melao e wela mo go bone. BOKHUTLO