06 Jul 2014

Morafe wa Maubelo o kopilwe go lebogela pula  ka seo se ka ba thusa gore ba tle ba ntshe dijo tse di nametsang kwa masimong a bone.

Kgosi Setlhare Lorekang o buile jalo kwa kgotleng  ka letsatsi la go lebogela pula le dijo tsa  temo  bosheng, a bolela fa dipula tse di neng tsa gosomana mo ngwageng oo fetileng di thusitse fela thata ka leuba le ne le tlhakaladitse mo lefatsheng leno bogolo jang kwa kgaolong ya Kgalagadi.

Kgosi  o supile  fa e le lantlha ba dira moletlo  oo ka ba ne ba bona go le matshwanedi gore e re  morago ga dipula tseo ba inaakanye le  temo e a kaileng fa e ba solegetse molemo fela thata gonne bontsi jwa batho ba kgonne go ntsha dijo tse di nametsang.

 Fa a tswa la gagwe, mmakgosi Mme Kebaetse  Lorekang  a re ene le bomme ba bangwe  ba ne ba dumalana  gore ba leboge pula le go isa dijo tsa temo kwa kgosing jaaka go ne go dirwa bogologolo.

Mma kgosi , yo gape e leng morutabana  o supile  fa maikaelelo a bone  e le go  tswelela  ba keteka letsatsi  leo ngwaga  le ngwaga e le tsela nngwe  ya go tsosolosa ngwao  ka dijo tsa setso mo motseng oo.

O supile fa  mo nakong e e tlang  ba tlaa  keteka moletlo oo  fela fa go simololwa  go jewa kwa masimong, a tlatsa  ka go  kopa baruti le diphuthego le setshaba ka kakaretso  go  tswelela ba  rapelela pula.

 Fa a ntsha lefoko la kgothatso, modulasetilo wa khansele potlana, Rre Sam Brooks  o rotloeditse morafe wa Maubelo go tswelela o lema ka seo se ka thusa gore ba kgone go ntsha dijo tse di lekaneng tse ba tlaa kgonang go ijesa gammogo le bana ba bone.

A re fa morafe o tsibogela temo go ka thusa  puso ka e tshwere bothata ja go tlhokomela batlhoki. A re puso e leka ka bojotlhe go tokofatsa lephata la temo-thuo gore Batswana ba kgone go ntsha dijo tse di lekaneng. O  abetse morafe kgomo e le  tsela ya go ba rotloetsa mo moletlong wa ngwaga o o tlang.

Lebutswa pele la motse oo, Mme Sekwena Matebele o rotloeditse bana go ja dijo tsa Setswana ka a re di siametse mebele ya bone go na le tsa segompieno. BOKHUTLO