06 Jul 2014

Kgosi ya Morwa mo kgaolong ya Kgatleng, Rre Masisi Ntshole  a re  banana ga ba supe kgatlhego mo mananeong a  puso e ba a diretseng.

Fa a bua mo potsolotsong le BOPA bosheng, Kgosi Ntshole o  tlhalositse  fa puso e ntshitse mananeo ka go farologana gore banana ba itshetse ka one mme bone ba inaakantse le ditiro tsa botlhoka tsebe fela.

Kgosi Ntshole a re le fa go na le ba ba itekang ka go lema merogo le go rua dikoko, bontsi jwa banana ba inaakantse le nnotagi  e e leng yone tshoso e rweleng mo go tlhokeng tsebe ga bone.

Mo go tse dingwe, kgosi o tlhalositse fa ditlhabololo mo motseng wa gagwe di tsamaya sentle ka khansele e ba file madi go baakanya ditsela le kokelo,  sebe sa phiri e le kwelo tlase ya itsholelo e e amileng lefatshe leno, e a reng ke yone e emisitseng ditlhabololo tse dingwe.

Kgosi Ntshole a re o tshwenngwa ke kgang e mo go yone baratani ba nnang mmogo ntswa ba sa nyalana, a supa fa batsadi e le bone tshoso e rweleng mo kgannyeng e.

O tsweletse a tlhalosa fa batsadi ba letlelela bana ba bone go dira jalo mme fa go nna bosula ke gone ba gopolang go tla go ikuela kwa bogosing, a tlatsa ka gore dikgang tsa go tshwana le tseo di ba tshwentse fela thata.

A re o lemogile fa bangwe ba batsadi  ba sa kgalemele bana ba bone ba lebile go ja, mme a re  gone moo  go  rotloetsa baratani go nna mmogo  ba  sa nyalana.

Kgosi Ntshole o rile gongwe fa puso e ka sekaseka molao o o itebagantseng le kgang e,  motlha mongwe ba tlaa kgona go lwantsha kgang  e a tlhalositseng fa e ba latlhisa ngwao ya Setswana. E rile a itebaganya le temo, a supa fa  morafe wa gagwe o lemile sebe sa phiri e le batho ba ba sa tlhokomeleng masimo a bone mme seo se tlise kgotlhang fa gare ga barui le balemi.

O  ikuetse mo baleming go tlhokomela masimo a bone, a tlhalosa gore go tlhoka go dira jalo go phutlhamisa maiteko a puso a go tokafatsa seemo sa temo mo lefatsheng leno bogolo jang ka puso e  phakisa balemi dipeo.

Kgosi a re o tshwenngwa ke morafe ka  go tlhoka go tsibogela diphuthego. BOKHUTLO