06 Jul 2014

Lekgotla la kabo ditsha la Kgatleng le rotloetsa setshaba mo kgaolong  eo go kwadisa ditsha tsa bone ka jaana go ka fokotsa dikgotlhang  tsa go lwela  lefatshe.

E rile a bua mo potsolotsong le BOPA, moanamisa mafoko wa lekgotla leo, Mme Portia Motlhabane a tlhalosa fa thulaganyo ya go kanoka ditsha e tlaa ba thusa go itse palo ya ditsha tse di dirisetswang kgwebo le bonno.

Mme Motlhabane o tlhalositse fa go supa setsha go sa lope sepe fa e se go ntsha bosupi jwa setlankana sa peo ya setsha, Omang yo o mo tirisong, tumalano ya tiriso ya lefatshe leo le mokwalo wa bogosi o o supang fa setsha se beilwe pele ga makgotla a kabo ditsha a tlhomiwa.

O tsweletse a re fa e le mokwalo o o tswang kwa bogosing, o tshwanetse wa nna le maina a basupi ba peo le bo Omang ba bone gammogo le bosupi jo bo ikanetsweng jo bo supang ka fa setsha se beilweng ka teng.

Mme Motlhabane a re mo nakong eno ba kwadisa ditsha kwa kgaolong ya Malolwane le kwa Mochudi mo dikgotleng tsa Makgophana, Mabodisa, Ntshinoge, Phaphane le Raserura.

Le fa go ntse jalo, Mme Motlhabane a re bangwe ba kgaoganya ditsha tsa bone fa ba sena go di abelwa ba sena tetla ya lekgotla la kabo ditsha, mme seo se ba thatafaletsa tiro fa ba kanoka ditsha.

A re kgwetlho e nngwe ke gore ba bangwe ga ba epele mekono fa ba tshwanetseng go e epela teng  jalo o rotloeditse batho go epela mekono e e bonalang.

O boletse fa  ba sa kwadise ditsha fela, ba dira le ditlhotlhomiso go netefatsa gore a motho o supa setsha sa gagwe sa nnete.

Mme Motlhabane a re fa go fitlhelwa beng ba setsha ba tlhokafetse, bana ba moswi ba kgona go ya go supa setsha seo mme maina a bone botlhe a kwalwa mo pampiring ya ikwadiso, a tlhalosa fa ba losika e le bone ba ba tlhophang yo ba mo fang setsha seo mo baneng bao.

O tsweletse a re ba ba nang le ditsha kwa Mochudi mme ba sa nne teng, ba ka neeletsa batho tsotlhe tse di tlhokegang gore ba ye go ba supela ditsha tseo.

Mme Motlhabane o ikuetse mo setshabeng go ba thusa go supa ditsha tse e leng matlotla gore ba itse gore beng ba tsone ke bomang.

A re ba ikaelela go wetsa thulaganyo ya go kwadisa ditsha kwa Mochudi mo dikgotleng tsa Makgophana, Mabodisa, Ntshinoge, Phaphane, Raserura le Boseja  gammogo le kwa  Malolwane ngwaga o ya fifing, jalo ba rotloetsa batho ba ba nang le ditsha mo mafelong ao go netefatsa gore ba supa ditsha tsa bone. BOKHUTLO