18 Jun 2014

Kgosi wa Monwane mo kgaolong potlana ya Letlhakeng, Rre Letlamoreng Masono a re morafe wa gagwe ga ona tlotlo mo bogolwaneng jwa motse.

Fa a bua mo phuthegong e e neng e buisiwa ke mopalamente wa kgaolo ya Letlhakeng Botlhaba, Rre Liakat Kablay, kgosi o tlhalositse fa banni ba motse ba palelwa ke go tla diphuthegong ka dipalo tse di nametsang, a tlatsa ka gore go supa fa ba a nwa bojalwa phetelela e bile ba leletsa diwelese kwa godimo mo gare ga masigo.

Rre Masono o boletse fa barui ba tlogela leruo la bone ba sa le tlhatlhela mme le senye mo masimong. Mo godimo ga moo, a re o tshwentswe ke thuto ya bana e e welang tlase gammogo le borukutlhi jo bo ileng magoletsa mo motseng wa gagwe. Kgosi o tsweletse a tlhalosa fa  ditlhabololo di saletse morago fela thata.

Fa a tsibogela mafoko a kgosi, Mopalamente Kablay o tlhalositse fa kgosi a tshwanetse go gagamatsa molao mo motseng gonne  dikgosi le dikgosana di filwe marapo ao. O boletse fa barui ba ba sa tlhokomeleng leruo la bone ba tshwanetse go atlholwa.

Mopalamente a re thuto ya bana ba kgaolo ya Letlhakeng e wetse tlase fela thata ntswa puso e ntsha madi a mantsi mo mohameng wa thuto. O gakolotse banni go tshwaraganele thuto ya bana le barutabana go ntsha maduo a a botoka.

O tlhalositse fa go simolola kgwedi ya Seetebosigo puso e tla simolola go baakanya tsela ya Monwane.

Go sa le jalo, Rre Kablay o boleletse batsena phuthego gore e tla a re go simolola monogwaga dikgosi le dikgosana ba tla duelwa go ya ka fa ba dirang tiro ya bone ka teng. A re dikgosi le dikgosana ba tla isiwa kwa Ramatea go rutuntshiwa ka go etelela morafe pele. BOKHUTLO