17 Jun 2014

Tona  wa  pereko  le  selegae, Rre Edwin Batshu  o  kopile  maloko a kereke  ya Head Mountain of  God go eteletsa  pele  maitlamo  a  go  tsisa  kagiso le thokgamo mo  setshabeng  le  mo  lefatsheng  ka kakaretso.

E rile a bula  semmuso  ntlo  ya  kereke eo  kwa  Senete ka Tshipi, Seetebosigo a tlhola malatsi a le lesome le borataro, Rre Batshu a  tlhalosa fa    dikereke  di  tshwanetse go  tshwaragana le  puso  go  tswa  ka  mananeo a  a  nitameng a  a  ka  laolang dikgwetlho  di  tshwana le kgokgontsho ya  bong, tiriso  botlhatswa ya  nnotagi  le go ima  ga  banana. 

Rre  Batshu o  boletse  fa dikereke di lebanwe ke dikgwetlho tse di akaretsang  go tlhoka boeteledipele ja motia jo bo nang le boikarabelo mo go  diragatseng maitlamo  a  kwadiso  le  go  tlhokomela  tsamaiso  ya  tsone. 

O tsweletse a  supa  fa  seo  se  baka  go  kubetsana, go dirisa  botlhaswa maemo le go ikgaphela kwa ntle  ga maloko fa go tla mo go tseyeng  ditshwetso  tse  di  maleba  mabapi  le  dikgang  tsa konokono tsa kereke.

Tona  a  re seemo se,  se a tshwenya  ka  se  tlisa  ketsaetsego mo bathong e bile  se ba rontsha   tshwanelo ya  go obama ka fa ba eletsang ka teng. 

O  tsweletse a bolela  fa  lephata  la  gagwe le  simolotse  go  lebelela  ditsamaiso tsa  dikereke go  balelwa le  melao  metheo ya tsone go  leka  go hema seemo sa  go nna jalo.

O ba  gwetlhile go  nna  le  kgatlhego  mo tsamaisong e  ntsha ya dikereke gore ba kgone go  baakanya melao metheo ya dikereke tsa bone le go fokotsa diphapaang.  Rre Batshu a re,“Ke  boikarabelo jwa  gago o le moeteledipele go ruta  maloko molao motheo  le maitlamo le go ba neela boikarabelo  jwa  go diragatsa tshwanelo ya bone.”

O tsweletse a  tlhalosa fa  therisano le  neelano di le botlhokwa  mo  go  tsamaiseng  kereke, jalo a supa fa  dikereke dingwe di atlegile  ka  ntlha  ya  therisano  fa  dingwe di  thubilwe  ke go e tlhoka.

Rre  Batshu  o  akgoletse  maloko  a  kereke ya Head  Mountain go nna le therisano le go dira ka mowa o le mongwe, a supa fa seo se di dirile gore ba kgone go aga fa ba obamelang teng.

Mokwaledi  mogolo  wa  kereke  eo, Moruti Tendani Manyiwa  o kopile  gore  dikereke  di  ntshiwe mo  go kwadisiweng  ka fa tlase  ga mekgatlho,  a supa fa seo se ba kokonela  ka  dikereke tsa bone di sa dire dipoelo gonne e le mafelo a go obamelwang teng fela.

Moruti  Manyiwa o boletse gape  fa  ba  santse  ba  kgaratlhela go aga ka  bontsi jwa dikerere tsa  bone di tshwarela  bokopano ka fa  tlase ga ditlhare mme  ka  fa  letlhakoreng le lengwe ba lopiwa  lekgetho, selo se a supileng se ba babalela fela thata.

O rile  ba eletsa gape go tsenya  ditlhabololo  mo  dikagong  tsa  bone  di tshwana le metsi le  motlakase mme dithwatlhwa tse ba di lopiwang di ba baya ka fa mosing. BOKHUTLO