12 Jun 2014

Mogolwane wa tsa thuto kwa kgaolong ya Kweneng, Rre Mokwadi Tese a re thuto ke yone konokono ya botshelo jwa ngwana.

Fa a bua  mo phuthegong ya batsadi, barutabana le bana ba mophato wa boraro kwa sekoleng sa Tshegetsang bosheng, Rre Tese  a re bana ke batho ba ba santseng ba gola jalo go matshwanedi gore ba tshwaraganelwe.

O kgothaditse batsadi go lemoga gore bana ke tshegofatso ya Modimo jalo ba tshwanetse go ba tshwara ka manontlhotlho. Rre Tese o tsweletse a re bohutsana jo bo nnang mo dipelong tsa batsadi fa bana ba sa dira sentle kwa sekoleng, bo ka alafiwa fela fa batsadi ba ka tsenya letsogo mo thutong ya bana.

A re maitseo a ngwana a simolola  kwa lwapeng, jalo go tlhoka botho ga ngwana go dira gore motsadi wa gagwe a tsamae a sa apara ka gonne batho ba dumela fa a tswa kwa lwapeng a ntse jalo.

Fa a itebaganya le baithuti, Rre Tese a re fa ngwana a sa reetse motsadi, o a bo a solegile ka go bo go sena kwa a ka bonang botlhale teng, ka jalo ngwana yo o reetsang motsadi, o nna le botlhale e bile lefa a ka palelwa ke dithuto, botshelo jone o a bo kgona.

O gateletse ka gore, “Bontsi ba lona gale palelwe ke dithuto, mathata a matona a lona ke go tlhoka go reetsa batsadi.”

Mogolwane o tlhomamisitse gore go tshwaraganela bana ga batsadi le barutabana go nonotsha  bana thata ka gore le bone ba tia moko mme ba seke ba ipone tsapa go iteka.

O tsweletse a re letsholo le la go kopanya batsaya karolo mo thutong ya ngwana le simolotse ka 2012 mme le supile maduo a a itumedisang ka gore bana ba dira maitlamo ba bo ba a sale morago.

O kgadile a sa kgwe mathe batsadi ba a reng ba nna fela ba tshwaregile fa ba tshwanetse go kopana le barutabana.

A re batsadi bao, ga ba kgathalele thuto ya bana ba bone mme selo se, se digela tlase le go bolaya thuto ya bana.

Rre Tese a re o tshwenngwa ke batsadi bangwe ba a reng ga ba itse go tlhopha mofoko a a siametseng ditsebe tsa bana, a tlhalosa fa seo, se dira gore bana ba akanye gore mafoko ao a siame fela ka jalo le bone ba a dirise.

O gateletse thata gore batsadi ba tshwanetse go emisa go dirisa mafoko a lesotlo mo baneng ka gore ba kgona go fetoga se ba se bidiwang. O supile fa  mafoko  a a dirisiwang a tshwanetse go tlhabolola le go aga bana eseng go ba kgokgontsha.

Rre Tese o tlhalositse fa ngwana  ele moemedi wa motsadi kwa sekolong, jalo a ba kgothatsa go ikgapha mo diritibatsing, dinotagi le go tsamaya ka dilo tse di borai jaaka dithipa gore ba kgone  go laolesega. BOKHUTLO