12 Jun 2014

Moeteledipele  wa setlhopha sa Thari ya Setso kwa Tsabong a re  monongwaga ba tla feta ka tse di tsididi ka ba ipaakanyeditse  dikgaisano tsa malatsi a ga tautona  tse di tla a  tshwarwang  kgwedi e e tlang.

Rre Tshwarelo   Mmoloki  o  tlhalositse  fa ngwaga o o fetileng ba tsere maemo a ntlha mo karolong ya badiragatsi ba ba magorogo  masha., a supa fa se, se  itumedisitse banni ba kgaolo ya Kgalagadi fela thata ka ba re setlhopha se  tlotlomaditse  sa bo sa  tsholetsa serodumo sa  bone.  O kaile fa  ba na le kgwedi ba le mo kampeng go ikatisetsa  dikgaisano tseo .  

O tsweletse a bolela fa ba simolotse setlhopha se morago ga go sa dira sentle  mo dithutong tsa bone tsa sekole. A re ba simolotse ba le masome a mabedi le botlhano ba bina mmino wa phathisi o e leng one ba neng ba gaisanya ka one ngogola. O tsweletse a tlhalosa fa monongwaga ba tlhakantse mmino le motshameko go supa tota se pina e se tlhalosang. 

A re monongwaga pina ya bone ya re “ngwao ke bojanala”,  jalo borre ba tla a bo ba apere dibaki tse di dirilweng ka matlalo fa bomme bone ba tla bo ba ikokegile ka dijale  e bile ba tshwere ditlatlana go supa ngwao. O kaile fa maikaelelo a bone ele go somarela  ngwao  gore dikokomane  di tle di e fitlhele 

 A re ba remeletse mo go reng dikgosi di eme ka dinao di bitse mephato. O tsweletse a  re, “ Re le badiragatsi e kare bojale le bogwera re di seegetse kwa thoko mme ra re dikgosi di eme ka dinao gore ngwao e bolokwe”. Rre Mmoloki o boletse fa mmino wa setso o ka rekisa lefatshe la Botswana kwa ntle.

 O tsweletse a re, le fa ba kile ba nna le kgwetlho ya letlhoko la madi pele ga ba tsenelela dikgaisano tsa ga tautona, ba setse ba golotse dipina di le pedi tse di dirang sentle fela thata, mme ba  ikaeletse  go golola DVD monongwaga. O tsweletse  a re ka ba itse kwa ba batlang go ya teng, ga ba kgobege  marapo le fa ntswa ba lebanwe ke kgwetlho ya batho ba ba gwebang ka mmino  e se ka fa molaong. 

 O supile fa dikgaisano tse di ba thusitse fela ka ba  itshetsa ka madi a ba atswiwang  ka one  gonne ba  bereke. A re o batla go bona setlhopha sa gagwe se godile se itsiwe le kwa mafatsheng a sele. Rre Mmoloki  o kgothaditse banana go  tsaya bodiragatsi  ka tlhoafalo ka bo ka  isa motho kwa  mankalengkaleng. 

O supile fa boineelo, bopelotele, tirisanommogo,  lorato  le go tlotla nako  ele tsone tse di ba kgontshang go dira tiro ya bone ka bokgabane.BOKHUTLO