09 Jun 2014

Unibesithi ya maranyane kwa Palapye (BIUST) e  tla a sologela ba le bantsi  molemo, segolo jang  ba ba nyoretsweng thuto jaaka barutabana le bana ba ba eletsang go ikoketsa  thuto.

E rile a bua mo letsatsing la barutabana kwa sekoleng se segolwane sa Mmaphula kwa Palapye  mookamedi wa sekole seo Professor Hillary Iyang a tlhalosa fa dikgoro di butswe kwa BUIST gore barutabana ba dikole tsa Palapye ba tle go ikoketsa dithuto segolo  jang  tsa  borenyane ka go supega fa ba saletse  morago mo go tsone.

Professor Iyang a re barutabana ke bone ba kgweetsang ditlhabololo tsa dikitso ka go tlhatlhelela bana, jalo go botlhokwa gore badire jalo ba na le dikitso le lenaneo le le tsepameng la dithutego  gore ba ntshe ga tshwene.

O tlhalositse fa  ele maikemisetso a sekole seo go thusa go ba tlhabolola mo go tsa borenyane kwa ntle ga dituelo dipe. Professor Iyang o kopile barutabana go sola  molemo mananeo a e tla a reng mo isagong ba ipelafatse  ka one.

A re mo nakong eno, ba na le lekalana la boengeneere,  la  boranyane,  la tsamaiso kgwebo le la temo thuo, a tlatsa ka gore maikaelelo ke gore ba anamele kwa dikgaolong go bula makalana a BUIST teng. O supile fa ba tla a bula kwa Selebi Phikwe, Francistown le Gaborone  mme e re morago ba ye kwa Gantsi, Maun le Kanye, maikaelelo ele go isa BUIST kwa bathong.

Prof Iyang a re  borutabana ke tiro e e nang le dikgwetlho tse di batlang gore motho a tseye boikarabelo ka maikaelelo a go tokafatsa boleng ja ngwana le go mmopa gore lefatshe le kgone go mo amogela, jalo a re seo, se tlhoka boineelo.

O tsweletse a re barutabana ba ka fetola diemo le dilo di le dintsi fa ba na le dikitso le dithutego tse di lekaneng godira jalo ga mmogo le gore bana le bone ba kgone go  amogela diphetogo le go di tsaya ka kitso ya go lemoga fa di tla a ba sologela molemo mo  isagong.

O kgothaditse  barutabana  go leba dilo ka leitlho la go ikgodisa le go itlhabolola gore ba tswe mo ngwaong ya segologolo ka seo e ka nna sekgoreletsi mo go tsweleleng le go goleng ga bone.

A re go monate go bona motho a dira tiro ka lerato ka go ka  kgontsha motho go dira ka natla. A re o lemoga sentle gore matshelo a bone a botlhokwa le gone ke tshwanelo ya bone go tshela sentle. A re le fa go ntse jalo, ga ba a tshwanela go itlhokomolosa ngwana le gone go lemoga gore a tikologo e ngwana a golelang mo go yone e siame e bile e fa ngwana sebaka sa go amogela se a se rutiwang.

Prof Iyang o rsweletse a re o tlhaloganya sentle diemo tse barutabana ba berekelang mo go tsone  fela a tlhalosa fa thuto e na le ditsela di le dintsi tse di farologaneng  mme fela kwa phelelo ke gore a ba ba e neelwang ba a e tlhaloganya. . O kopile barutabana go itse le go tlhaloganya tlhaelo le bokgoni ja bana ba ba ba rutang.

O galaleditse lefatshe leno ka go nna le tebelopele go tswa goo lowe, a re ke ka moo le itshetletseng mo itsholelong. O tsweletse a re go rurifatsa seo le kgonne go tlisa mmadikole wa marenyane wa seemo se se lekanang  le sa BIUST, se ka  2018  se tla a simololang go alosa dialogane di ka  nna 1 500 go tswa mo makalaneng a a farologaneng. Bokhutlo