25 May 2014

Banni ba motse wa Mosetse mo kgaolong potlana ya Tutume ba rotloeditswe go ikemela ka dinao go batla lefatshe la temo.

E rile a bua kwa moletlong wa go ipelela thobo kwa Mosetse bosheng, Rre Joe Linga wa molemi a tlhalosa fa temo e le seikokotlelo sa Motswana.

O rotloeditse banni go ema ka dinao go batla lefatshe gore batle ba kgone go itemela go nyeletsa lehuma, a tlatsa ka gore lefatshe ke khumo.

Rre Linga a re modimo o tlhodile lefatshe gore motho a nne mo go lone mme a le dirise ka go tshela ka mofufutso wa phatla ya gagwe.

A re kwa tshimologong, e ne e se motho yo ratang temo ka e ne ele motho wa dikgwebo fela , mme rraagwe a mo supegetsa botlhokwa jwa temo.

O tlhalositse fa tshimo ya gagwe ele diekere tse di lekgolo le masome matlhano, (150 hectares) mme a lemile mabele mo go yone yotlhe.

A re ngwaga ono one a solofetse thobo e e kwa godimo, sebe sa phiri ke gore dingwe ditema dine tsa somolwa ke dinoyane bogolo jang temo ya diekere tse di tlhano ya lebelebele.

Rre Linga o kopile banni ba Mosetse go tla go mo thusa go roba mabele, a re o eletsa gore fa a sena go roba a fe bao ba ba godileng ba ba sa kgoneng go lema mabele.

A re temo e na le dikgwetlho mme e bogadi bogaufi, a tlatsa ka gore thobo ya gagwe e mo fa madi a hetang sedikadike sa Dipula.

Rre Linga a re maikaelelo a gagwe ke go oketsa tshimo ya gagwe gore mo dingwageng tse di tlang a ipone le ene a itheketse tlhootomo ka madi a temo.

Molemi wa monana, Rre Motho Tshambani o kgothaditse balekane ka ene go tlhwaafalela temo, a re eseka ya re pula e phaila batsadi ba ya kwa masimo ba tlogetse bana mo malwapeng a re ba rute bana ba bone botlhokwa jwa temo.

Rre Tshambani a re temo e na le dikgwetlho tsa go tsoga bosigo le go robala bosigo, gammogo le go tlhapa thari, mme a re kwa bofelong wa a bo a bone se a neng a se batla.

O kopile banana go leka sengwe a re le fa ele ekere e le nngwe fela ya dinawa ke sengwe se se ta ba tiisang moko.

A re o itemogetse gore ngwaga le ngwaga fa pula e phaila, o nna a ipona fela a tsamaya a le esi kwa masimo, a re gongwe seemo se se tla a thokafala.

Fa a mo kgwa dikgaba, Mme Tawana Phaladzi o lebogile Rre Linga go menagane a re o dirile Pandamatenga mo motseng wa Mosetse ka gore banni ba mosetse batla a tlogela go ya go bereka mabele koo mme ba dire mo gae.

O kopile Rre Linga go duela batho ka mabele eseng ka madi, a re madi ao ba a go boa ba a dirisa go reka dijo gape mo go ene. BOKHUTLO