22 May 2014

Makhanselara a kgaolo ya Bokone Botlhaba ba supile koporase ya metsi ya Water Utilities ka monwana ba re go lebega e tabogetse go simolodisa thulaganyo ya tiriso ya dikarata tsa go reka metsi mo dipompong tsa setshaba e ise e ipaakanye sentle.

Ba buile jalo ba akgela mo pegong ya komiti ya ditlhabololo tsa kgaolo le mo mafokong a modulasetilo wa khansele, Rre City Kealotswe, mo phuthegong e e tsweletseng ya khansele.

Ba tlhalositse fa bontsi jwa metshine e e goketsweng mo dipompong tseo, e sa bereke, selo se ba rileng se jesetsa ba ba ikaegileng ka dipompo tseo mo kgobedung.

Makhanselara ba re, fa koporase eo e santse e itebagantse le go baakanya metshine eo,bogolo e bulele setshaba dipompo go se inola mo lenyoreng.

Ba tsweletse ba supa fa ba tshwentswe ke gore le ntswa go sa bolo go duelwa, koporase eo e  maoto a tshupa go gokelela baikopedi dipompo mo malwapeng, bogolo jang ba ba thusiwang ke khansele ka fa tlase ga lephata la boipelego.

Makhanselara ba tsweletse ba supa fa  e santse e le kgang e e thata gore koporase eo e tsibogela dikgang tsa metsi, Ba re le fa badiri ba  koporase ba begelwa ka ditiragalo tsa go tshologa ga metsi, mo gongwe e bile go diragala mo matlhong a bone, ga ba nke ba tsibogela seemo sa go nna jalo.

Ba re go a makatsa gore mo lobakeng lo lo kana koporase eo e tsere ditirelo tsa metsi mo khanseleng, ba bo ba santse ba itsetsepetse ka mabaka a gore tlhaelo ya dikoloi ke yone e ba itsang go diragatsa tiro ya bone ka botlalo.

Fa a tswa la gagwe, e ntse e le mo go tse di amanang le metsi, Mokhanselara wa Gulubane, Rre Dikitso Mandevu o boletse fa le tsone dipampiri tsa tiriso ya metsi di tletse ketsaetsego ka jaana bontsi jwa tsone di tla di lopa madimadi.

Mokhanselara Mandevu a re ka ntlha ya seemo seo, batho ba felela ba ketefalelwa ke go duela mme ba koporase ya metsi bone ba bo ba kgaola metsi, ka jalo a kopa gore ba sekaseke go simolodisa thulaganyo ya dikarata mo malwapeng go fedisa ketsaetsego ya dituelo.

Mme Ruth Dlodlo, yo e leng mokhanselara wa Tati Siding, a re o bona badiredi ba le boitseme go dira tiro ya bone mme ba iphitlha ka kgang ya tlhaelo ya madi.
Mookamedi wa koporase ya metsi kwa Masunga, Rre Abednigo Mooka a re ba ikaelela go atolosetsa thulaganyo ya go duelela metsi ya dikarata mo malwapeng, a re mme fela ga go ise go tlhomamisiwe gore e tla simololwa leng.

O kopile setshaba go nna se itsese koporase ntle le tiego fa go na le bothata kgotsa tshenyego e e ka tswang e le teng e e amanang le phatlalatso ya metsi, a re ba tla leka bojotlhe go tsibogela seemo sepe fela.
Rre Mooka o tshepisitse banni fa ba tla tsholetsa dinao go netefatsa gore ba kgarametsa kgokelo ya metsi ya baikopedi ba ba setseng ba duetse. BOKHUTLO