18 May 2014

Kwa kgaolong ya Borwa Botlhaba mo motseng wa Ramotswa go bolelwa fa lenaneo la nyeletso lehuma le thusitse batho ba le bararo ka dimausu, a le mongwe  ka la go roka fa yo mongwe a santse a rekelwa didirisiwa tsa go apaya borotho.

Mafoko a, a boletswe ke modulasetilo wa komiti ya ditlhabololo tsa motse, Rre Paul Matongo, jaaka a ne a lekodisa morafe ka ditlhabololo kwa kgotleng ya Goo Ntsa, kwa phuthegong e e neng e biditswe ke mopalamente wa Borwa Botlhaba Rre Odirile Motlhale.

Rre Matongo o tsweletse a bolela fa batho ba le batlhano ba thusitswe ka lenaneo la dikoko fa ba le bararo bone ba neetswe  dipodi. O tlhalositse fa a tshwenngwa ke seemo sa batho ba ba tlhokafalang mme go sa itsewe se se ba bolaileng.

Fa a rola mafoko a gagwe, mopalamente Rre Odirile Motlhale, o tlhalositse fa a dule ka tshutiso e e neng e kopa palamente go abela dikgaolo madi a di ka a itirisetsang kwa ntle ga a khansele. A re madi a, e tlaa bo e le 2% ya kabo ya madi a setshaba, mme a tlaa fiwa dikgaolo ka go lekana, go dira ditlhabololo tse dipotlana tse puso e ka se kgoneng go di dira.

O tlhalositse fa go tlaa nna le komiti e e tlhokometseng madi a, mme mopalamente wa kgaolo a tlaa e etelela pele. Rre Motlhale o tlhalositse fa palamente e dumelane le tshutiso e mme ba emetse melawana e e tlaa laolang tsamaiso ya one.

Mo go tse dingwe, o boletse fa palamente e dumalane le molao wa gore go laolwe tiriso ya maranyane. A  re ka molao o, motho o ka kgona go itsheka fa mongwe a dirisa leina la gagwe botlhaswa kana a utswetswe ka maranyane. O tlhalositse fa pele ga molao o o nna teng, le fa motho a ne a gogagoga leina la yo mongwe  mo seretseng ka maranyane, a ne a ka se kgone go sekisiwa.

A re molao o gape o ka thusa  gore fa mapodise a kapile ditshwantsho di letlelelwe go dirisiwa e le bosupi kwa kgotla tshekelo.

Fa ba ntsha la bone, banni ba akgoletse mopalamente mogopolo wa go abela dikgaolo madi, ba supa fa o le montle fela thata. Ba tlhalositse fa ba a nwa metsi a a leswe ntswa  metsi a dutla gongwe le gongwe. BOKHUTLO