18 May 2014

Baithuti ba Boitekanelo College ba supile mowa wa kutlwelo botlhoko le lerato ka go abela bana ba dikhutsana ba sekole se sebotlana sa Tsabong melora e e tlhapang.

Mongwe wa baithuti bao, Mme Nicole Thipe o ne a tlhalosa fa e le baithuti ba ba nang le lebaka la dikgwedi tse tharo ba direla mo sepateleng sa Tsabong go ithuta ka tsa botsogo.

Mme Thipe o kaile fa ene le bangwe ba ba leng bane ka palo maikaelelo a bone e le go rotloetsa boitekanelo le bophepa mo dikoleng le mo metseng.

A re ba ne ba tsamaya mo motseng le dikole tse di mo Tsabong ba lekola botsogo le bophepa jwa bone, o kaile fa mo ditsheka tshekong tsa bone ba ne ba lemoga fa go na le bana ba ba sa lebegeng sentle ba le phepa ka mabaka a botlhoki mo sekoleng seo.

Moithuti go tswa kwa Boitekanelo College o ne a tswelela ka go tlhalosa fa ba ne ba dumalana ka bongwe fela jwa pelo go thusa bana bao ka melora e e tlhapang, a supa fa ngwana yo o nang le botsogo jo bo siameng a rotloetsega go ntsha maduo a a kgatlhisang thata mo dithutong tsa gagwe.

O kaile fa ba ne ba kokoanya madi a a kanang ka P460 a e leng one a ba kgontshitseng go rekela bana bao melora e e tlhapang, e e tlhatswang,  e e tlhapang meno le tse dingwe.

A tlatsa fa maikaelelo a bone gape e ne e le go fitlhelela le lengwe la matshego a tebelopele 2016, a tshaba e e nang le dikitso e rutegile ebile e itekanetse.

Fa a amogela dimpho tseo motshwarelela mogokgo mo sekoleng se sebotlana sa Tsabong Mme Dynah Gamodimo o ne a tlhalosetsa baithuti bao fa sekole seo e le sengwe sa tse dikgologolo ebile e le sa ntlha mo kgaolong ya Kgalagadi borwa, a supa fa gape se na le bana ba le 786.

Mme Gamodimo o ne a tswelela ka go tlhalosa fa sekole seo mo dingwageng tse di fetileng se ne se na le palo e ntsi ya bana ba dikhutsana. A re mme mo nakong ya gompieno palo eo e setse e fokotsegile fela thata morago ga gore ba lephata la botsogo ba emele ka dinao bolwetsi jwa HIV/ AIDS ka go thusa ka dipilisi tse di ritibatsang mogare.

O ne a galeletsa thata baithuti ba Boitekanelo College go bo ba ne ba bona go le botlhokwa go tlhopha sekole sa bone mo dikoleng tse ba di sekasekileng mo Tsabong, a kaya fa e tlaa nna baeteledipele ba tlhotlhwa mo lefatsheng leno ba ba nang le boikarabelo le gone go ba eleletsa masego le matlhogonolo mo dithutong tsa bone.

Fa a ntsha mafoko a tebogo modulasetilo wa komiti ya batsadi le barutabana (PTA) Mme Kelebilemang Sentlabane o ne a akgola baithuti bao go bo ba dirile tiro e ntle ya go abela bana melora. A kaya fa gape ba tlogetse motlhala o ba tlaa salang ba gopolwa ka one.

O ne a tlatsa ka go ba kopa go tswelela ba dira jalo le mo nakong e e tlang. BOKHUTLO