13 May 2014

Metshameko ya banana ya dikgaolo tsa botlhophi tsa Serowe Bokone e nnile le diphetogo tse di eletsegang mo boitshwarong jwa banana ba kgaolo eo.

Mo potsolotsong bosheng, mokhanselara wa Thabala, Rre Kadimo Oremeng, a re go simolodiswa ga metshameko e go thusitse fela thata, ka banana ba kgaolo eo ga ba sa tlhole ba amega mo dikgannyeng tsa diritibatsi le nnotagi jaaka pele.

O ne a tlhalosa gore fa e sale jaaka metshameko eo e simologa, bontsi jwa sebaka banana ba abo ba le kwa mabaleng, go le ditlhopha tse dingwe tsa motse le tsa dikgaolo tse dingwe.

Rre Oremeng a re go le gantsi banana ba ne ba tlwaelesegile ka go sasankega mo mebileng, ba tsaya letlhoko la mebereko e le sebaka sa go dirisa nnotagi go itlosa bodutu.

Ka jalo, a re mo sebakeng sa gompieno puso e ne ya lemoga se se ka senyetsa banana bokamoso, mme ya simolodisa metshameko e go ba thusa go ikgapha mo ditirong tse di k aba senyetsang isago, jaaka bogodu le gone go dirisa ditagi le diritibatsi botlhaswa.

O ne a tlatsa gape ka go supa fa metshameko e e rotloetsa banana go nna le popagano, e a tlhalosang e ba solegela molemo mo go abelaneng megopolo ka tse di amang matshelo a bone. Le fa go ntse jalo, Rre Oremeng o ne a gakolola batsamaisi ba metshameko go emisa go tsaya karolo kana letlhakore fa go tla mo ditlhopheng tse, ka se se ka rotloetsa dikgotlhang mo batshameking le barotloetsi ba ditlhopha. BOKHUTLO