12 May 2014

Go bolelwa fa lephata la temo thuo le tswa kgakala ka mananeo a go tokafatsa matshelo a Batswana.

Mafoko a a boletswe ke molemisi wa kgaolo ya Taung, Mme Keheng Basiame jaaka a ne a tlhalosetsa  batlhoki ka mananeo a puso.

Mme Basiame o  tlhalositse  fa go na le  lenane  la LIMID,  le le kgaogantsweng ka dikarolo  di  le dintsi. E rile  a  tlhalosa  ka   mananeo  a   mangwe,  a  bolela  fa mo lenaneong  la  dikoko  le dipodi, moikopedi  a  thusiwa  ka  P10-000 go  reka  diruiwa  le  melemo  ya  tsone.

Mme  Basiame  o  tlhalositse   fa mo lenaneong   la   dipodi, moikopedi  a  rekelwa  dipodi  di le   lesome,  tse di  namagadi  di roba bongwe   le  e le  nngwe  ya phoko.  A  re  podi  e   namagadi  e   rekwa  ka   P700  fa   phoko   yone  e  rekwa  ka   P1400,  mme  madi   a  a  salang  ke a  go  reka  melemo  le  dijo.

Fa  a  tlhalosa  ka   lenaneo   la   dikoko,  Mme   Basiame  o supile   fa  lenaneo   le,  le lone le thusiwa  ka P10-000,  mme moikopedi  a  agelwa   hoko   ya   dikoko   mo   lwapeng, a  rekelwa   dikoko   tse   dinamagadi  di  le masome  a   mabedi   le  bongwe   le   mekoko  e  le   mene,  fa   koko  e  namagadi  e   rekwa  P55-00    mokoko  one o  rekwa   P65-00. 

Fela jaaka   lenaneo   la   dipodi, madi  a  a  salang ke  a  a  tla rekelang dikoko melemo  le  dijo. Mme  Basiame o tlhalositse fa moikopedi a tshwanetse go ikopanya le ba ofisi ya boipelego fa a batla mananeo a.

A re  go  na  le  lenaneo  la  go  lema  merogo,  mme  moikopedi  o direlwa tshingwana ya merogo   mo  lwapeng, a  tsenyediwa  tanka  ya  metsi  le  gone  go  lemelwa  merogo. 

O supile fa  ka lenaneo le,  moikopedi a solofelwa go dirisa  metsi a pula go nosetsa, fa a pompo one a ka dirisiwa fela fa  go sena  metsi  gotlhelele.

Mogolwane go  tswa kwa  ofising  ya  Forestry Rre Olefile  Mahupu, o  tlhalositse  fa ba ofisi  ya  bone, ba na  le  lenaneo  la  go  lema  ditlhare  le  dithunya mme ba  thusa moikopedi  ka  tanka   ya   metsi   le  go   mo  agela   tshingwana.  A re  pharologanyo  ke gore   moikopedi  ga   a  dirise   metsi  a  pompo. O  tlhalositse  fa  moikopedi a  isiwa dithutong  tsa  go  lema  ditlhare sebaka sa beke kwa Sebele.  Bokhutlo