05 May 2014

Mookamedi wa cluster 8 Rre Tikina Mahate yo o okametseng kgaolo ya Borakalalo, o tlhagisitse banni ba kgotla eo go emisa magatwe a a felelang a senya batho maina ka selo seo ele molato o motona fela thata.

O buile jalo mo phuthegong ya itekodiso ya mopalamente kwa kgotleng eo bosheng.

E ne ya re a lekodisa mopalamente Rre Gaotlhaetse Matlhabaphiri ka seemo sa borukutlhi jwa kgaolo eo, Rre Mahate a supa fa se wetse tlase fela thata.

A re, mme le fa go ntse jalo, go nale bolwetsi jo bo neng jwa jwalega mo baaging ba kgotla eo jwa go senya mokhanselara wa  bone leina.

O tlhalositse gore go nale batho ba ba tsamayang ka magatwe a gore Rre Shabir Kablay o bonwe a gateletse ngwana mongwe kwa kgaolong ya  Khuduyamajapye a mo kgaola tsebe.

Rre Mahate a re, se, ga  se nnete ke go batla go senya mokhanselara leina fela.

Rre Mahate o tlhalositse gore e rile ba sena go utlwa kgang e, ba e sala morago mme ba fitlhela ele magatwe fela e bile e amanngwa le ditlhopho.

O tlhalositse fa ba ne ba tsaya matsapa a go ya teng kwa  Khuduyamajapye kwa ba neng ba kopana le Kgosi yo o tlhalositseng fa go ise go begiwe kgang ya go tshwana le eo kwa kgaolong ya gagwe.

Fa a ba ema ka lefoko, motsadi wa ngwana o tlhalositse fa ba nna bale barataro kwa ga bone e bile ba ntse bale kalo go ise go nne le ope yo o kileng a nyelela kgotsa  go kgaolwa tsebe, a bolela fa se ele magatwe fela e seng sepe gape.

Fa a tsibogela seemo, mopalamente o tlhalositse fa go amanya motho le polao ya yo mongwe go ama fela thata.

A re, e ne yare a tsenelela ditlhopho ka ngwaga wa 2004, ene le Rre Daniel Kwelagobe  ga tlala mo motseng gore ba bolaile mosadi mongwe.

A re, koloi e ba neng ba  ngaparesitse ditshwantsho tsa bone mo go yone, e ne ya thubiwa ka matlapa fa marekisetsong a Mafenyatlala.

O boletse  gore nako le nako fa go nna le ditlhopho dikgang tsa go nna jaana di a buiwa.

O tlhaloseditse morafe gore golo moo ke go senya motho leina, mme  o tsweletse a re, Modimo o sekela ba ba senngwang leina ka boammaruri bo nna fela bo tswa.

A re, o  itumelela gore nnete e dule e bile mmagwe ngwana o tlile go tla go tlhatswa mokhanselara leina fa  pele ga phuthego.

E ne yare fa ba akgela, morafe wa Borakalalo wa tlhalosa fa batho ba ba anamisang magatwe a a  tshwanang le a, ba dira gore batho ba tshabe mokhanselara, jaanong ba ipotsa gore batho bao ba batla gore Rre Kablay a tshele jang.

Ba kopile gore  go emisiwe go anamisa magatwe a senang  lepele le morago, ka ba tla itsenya mo molatong.

Fa akgela mokhanselara Shabir Kablay o lebogile ba ba boneng fa kgang e, e se nnete ele go batla go mo senya leina fela.

A re, o lemogile fa Modimo o le teng ,ka ke mo gompieno o mo seketse gore nnete e nne mo mpaananeng. BOKHUTLO