28 Apr 2014

Basekisiwa ba ba lebisitsweng molato wa go thukutha marekisetso a Engen Filling Station P2 743, Mothusi Popego (33) wa kgotla ya Masuaditshwene le Mothibedi Motoloki (36) wa kgotla ya Matlhalerwa kwaMolepolole ba atlhotswe dingwaga di le lesome mo kgolegelong.

Popego le Motoloki ba na le ba bangwe ba le bararo, ba na le molato o mongwe o ba o lebisitsweng wa go kgothosa marekisetso a dino a Deep Horizon Club kwa Mmakgodi, madi a kana ka P20 000, seletso sa madi a P3 000 le diunits tsa tlhwatlhwa ya P3 000 ka kgwedi ya Lwetse ka 2012.

Ba bosekisi ba tlhalositse fa e ne yare ka kgwedi ya Phalane a le malatsi a le mararo, basekisiwa le ba bangwe ba le babedi ba ba iseng ba tshwarwe, ba thukutha marekisetso a Engen Filling Station mo kgotleng ya Magokotswane mo Molepolole P866, dipakete tse di masome a mane tsa metsoko ee farologanyeng tsa tlhwatlhwa ya P1 102 le mogala wa letheka wa modiro wa Samsung Duo wa madi a P775.

Mo tshekong basekisiwa boo babedi ba ne ba bolela fa ba ne ba seo kwa lefelong la tiragalo mme ditsala tsa bone tsa maina a Dikabelo le Mike ba ba santseng ba batliwa ke ba sepodise eleng bone badira molato.

Fa a ipobola, Popego o ne a kopa lekgotla gore le mo sekasekele katlholo a re o kubugetswe ke bolwetse a le kwa kgolegelong ebile kalafi e a e fiwang ga a tsee jaaka a tshwanetse ka ntlha ya tsamaiso ya kgolegelo.

“Ke kgona go fetsa dibeke tse pedi ke nna fela kwa kokelong ya kgolegelo mme ke sa bone thuso. Ke kopa gore lekgotla le ntshekatshekele ka gore botsogo jwame bo mo diphatseng,” Popego a kopa lekgotla.

O kopile gape gore, fa lekgotla le ntsha katlholo le simolole go bala ka dikgwedi tse di boferabobedi tse a di tshwerweng.Motoloki  le ene o ne a kopa lekgotla go bala go simolola ka nako e tshwerweng ka yone.

“Ke kopa lekgotla le seka la mpolaisa katlholo. Ga ke gane kena le melato eke setseng kee atlholetswe mme fa mapodise ba ne ba dira jaaka re ba kopile, ba senka Dikabelo le Mike go rurifatsa kgang, re ka bo re seo fa,” Motoloki a bolela.

Basekisiwa boo ba babedi go tlhalositswe fa ba na le melato e ba kileng ba e lebisiwa ya go thukutha ka dikgoka. Popego o kile a lebisiwa molato oo o le mongwe ke kgotla tshekelo ya Extension 2 mme a atlholwa dingwaga di le lesome mo kgolegelong, fa Motoloki ene a kile a lebisiwa melato ya go thukutha ka dikgoka  ele mebedi e yotlhe a atlhotsweng dingwaga dile lesome ka tatelano.  

Fa a ntsha katlholo, Rre Sibanda o ne a tlhalosa fa mabaka a ntshitsweng ke basekisiwa a le lolea ebile a ka se ba thuse ka gope. A re Popego le Motoloki go lebega ba sa ithuta sepe mo melatong e ba setseng ba e atlholetswe.

“Molato wa go kgothosa ke molato oo masisi bogolo jang fa lene le ipapanne ka dibetsa. Ka fa le dirileng ka teng go ne go tshosa ka le ne le tshotse matlapa a matona a le neng lea dirisa go thuba ka one le go tshosetsa babereki. Le tlaya kgolegelong lebaka la dingwaga di le lesome mme katlholo ya lona etla simolola ka nako e le tshwerweng ka yone,” mmakaseterata Sibanda a fetsa. Bokhutlo