10 Apr 2014

Makhanselara a kgaolo ya Borwa a kopile puso go rekela  bana ba dikole tse di potlana dinawa mo baleming go nale  go reka kwa mafatsheng a sele.

Rre Kgangetsile Gotsilewame wa Gasita o kopile jalo mo phuthegong ya khansele ee tsweletseng mo Kanye a re go dira jalo e ka nna thotloetso mo baleming.

Rre Gotsilewame gape o supile tlhobaelo ya gore koporase ya BAMB e kanna ya tlhoka go reka thobo ka ntata ya dipula tse di tsweletseng ka go tshologa.

Gape o ikuetse ka tsela ya Motlhalawakgomo-Lorolwane ee onetseng a ba a kopa gore e tshelwe kerabole kgotsa  mmu oo lokgarapana gore e kgone go dirisiwa ka  e sentswe ke dipula tsa  mo bosheng.

Mokhanselara wa Manyana Rre Peter Sithibe le ene one a ntsha matshwenyego mabapi le ditsela tsa  motse wa Mogonye tse a tlhalositseng fa  di ne di tswanetse go dirwa mme ga nama go emisitswe ka lobakanyana.

Mokhanselara wa Ntsweng  Botlhaba Rre Phenyo Thekeleza ene a kopa gore matlo a barutabana le one a gokelwe motlakase fa matlwana a borutelo a  gokelwa  gore barutabana le bone ba kgone  go akola.

 Rre Thekeleza ebile o ngongoregetse gore dingwe dikole di kgona go tsaya nako e telele di sena boeteledipele jaaka mogokgo, ebile a supa fa bangwe barutabana ba ipata ka gore ga ba kgone go dira  tiro ya bone sentle ka ntlha ya gore ga gona  motlakase.

Mokhanselara gape are tsela ya Trans Kalahari Highway ee ralalang dikgaolo dile tharo jaaka Borwa,Kgalagadi le Ghanzi enale mafuti a a masisi a ebileng a baka dikotsi tse di maswe ka e tlhogile bojang  jo bo leele.

Are seemo seo se masisi ka jaana ebile bajanala ba le bararo ba kile ba latlhegelwa ke matshelo gone mo tseleng yone eo.

Fa a akgela mo kgannyeng e mothusa modulasitilo wa khansele ya Borwa Rre Lt Col Fairbridge Pule one a tlhalosa fa tiego ya tsela ya Mogonye e dirilwe ke go senyega ga koloi ya metsi mme a supa fa ee berekang e santse e bereka kwa Thankane.Bokhutlo