02 Apr 2014

Go nna le mooki  a le mongwe kwa Malatswai go baya balwetse ka fa mosing.

Banni ba motse ba supile matshwenyego a, mo phuthegong ya kgotla e e neng e buisiwa ke mothusa- tona wa lephata la botsogo, Dr Gloria Somolekae, bosheng.

Matshwenyego a, a  simolotswe go begwa ke Kgosi Ketsieditswe  Bosigo mo mafokong a  kamogelo. Kgosi Bosigo o tlhalositse fa  go nna le mooki a le mongwe go kgoreletsa gore morafe o bone ditlamelo tsa  botsogo sentle.

A re go kgona gore e re mooki a  santse a thusa balwetse, go bo go tla molwetse yo o gateletsweng  thata, mme a bo a patelesega go tlogela ba bangwe  go mo ragosetsa kwa kokelong  e kgolwane mo metseng e mengwe jaaka Serowe.

Mo godimo ga moo, a re, ka mooki a nale thulaganyo  ya go isa ditlamelo tsa botsogo kwa merakeng le kwa dipolaseng, nako tseo balwetse ba ba tlhokang thuso ba sala  ba le mo mathateng.

O tladitse ka gore mooki yo,  ga a tshaise ka balwetse ba kgona go mo tsosa bosigo. Modulasetilo wa komiti ya ditlhabololo tsa motse oo, Rre  Kenakgang Makeshane, le ene o ne a iteela mafoko a ga kgosi kobo moroko , a tlhalosa gore fa  mooki a isitse ditlamelo kwa  merakeng  le dipolaseng,  batho ba ba mogae ba ba batlang dithuso tsa botsogo ba sala ba sa thusiwe.

Rre Makeshane o  tlhalositse fa thulaganyo ya  go isa ditlamelo kwa  merakeng  le dipolaseng  e siame thata, ka jalo a kopa puso gore ba tsisediwe mooki wa bobedi gore  yo mongwe a nne a kgona go ya go thusa kwa dipolaseng le kwa  merakeng sebakanyana,  fa yo mongwe a setse a thusa batho ba ba mo motseng.

O ne gape a kopa gore, badisa dikago tsa kokelwana ya bone  ba agelwe fa ba theogelelang teng. A re, dipula tsa bosheng di feletse fela mo go bone.

Fa a tsibogela matshwenyego ao, mothusa-tona Dr Somolekae  o tlhalositse fa ba nale thulaganyo ya go tlisa mooki wa bobedi mo motseng oo. BOKHUTLO