02 Apr 2014

Balemi bangwe ba ba inaakantseng le temo ya molapo mo kgaolong ya Bokone Bophirima ba lela sa ga ragele morago ga gore dijwalo tsa bone di apesiwe ke merwalela ya metsi a dipula tsa bosheng.

Balemi ba molapo ke ba ba lemang fa tlase ga noka, mme dipula tsa bosheng di bakile koketsego ya metsi mo nokeng ya Thamalakane. Bokete jwa metsi ao, bo dirile ketsaetsego mo banning ka bangwe ba re noka e a tshela fa bangwe ba re nyaa ke merwalela ya dipula ka ditso di supa fa noka e tshela ka kgwedi tsa mariga.

Metsi one mo nokeng a a boitshega e bile a gomagometsa go tsenelela malwapa a a mo letshitshing la noka. Mo potsolotsong le ba ba amegileng, go supega fa a ba feletse a le tlhaeng ka jaana ba ne ba solofetse go le gontsi mo temong ya bone.

Ba re, temo ya molapo e bogadi bogaufi mme ba supa fa gompieno ba bone mo ba iseng ba go bone ka jaana e le la ntlha go ba diragalela. Ba tsweletse ba re, ba dumela fa e le merwalela ya dipula tse di neleng ka bokete bosheng ka jaana noka yone e simolola go tshela mariga.

Mongwe wa bone, Mme Kebiditsemang Matebele wa motse wa Shorobe a re, gompieno metsi ao, a ba tshoganyeditse ka jaana ga ba a bona, ba bone fela fa noka e tshela.

A re, o ne a lemile magapu, mmidi, dinawa le mabele mme o dule fela a iphotlhere ka di boletse mo tshimong ka jaana metsi a dikhurumeditse. Mme Gaetswegope Lentswe wa Shorobe le ene o supile bohutsana ka se se diragetseng, a tlatsa ka gore metsi a mantsi ao, a bakilwe ke dipula tse di neleng bosheng.

A re, o ne a solofetse go bona thobo ya dikgetsi di ka nna lesome mo dijwalong tse a di lemileng, mme jaanong o setse fela a itshopere. O tsweletse a tlhalosa fa a sa bereke mme temo e le yone e mmelegeng ka jaana a tshedisa bana ba gagwe ba ba tlhano ka yone.

A re, gompieno bana ba wela mo isong mme a ikuela mo pusong go ba tswa mokgosi.   Mme Lentswe a re, gantsi metsi a nna mantsi fa noka e tshela. Mme Xao Reekae le ene ga a kgale mathe go tlhalosa ka fa ba senyegetsweng ka teng.

A re, o ne a lemile maphutse, marotse, dinawa e bile a solofetse go ja mohuhutso wa phatla jaanong merwalela e mo sodile. O tsweletse a re, o tshedisa bana ba gagwe ba ba ferang bobedi ka temo.

Le ene, o kopile puso go ba akanyetsa ka jaana metsi ao a tsile ka nako e ba sa e solofelang. A re, e re ka ba ne ba dirile maiteko go ipeela ditemanyana, bogolo ba phimolwe dikeledi ka sengwe, e ka nna madinyana kana dijo gore ba tshedise bana.

Ba re, se se ngomolang pelo ke gore ba ne ba thusitswe ka dipeo ke puso mme jaanong madi a tsene ka motlhobodika. Mme Reekae a re, e re le ntswa ba senyegetswe ga ba ipone tsapa go nna ba etela masimo a bone ka tumelo ya gore ba tla fitlhela metsi a eletse mme ba kgone go selasela.

A re, ba pagama mokoro jaanong fa ba tsena mo masimong a bone. Bokhutlo