13 Mar 2014

Mogolwane kwa lephateng la kabo ditsha a re matlotla a tsweletse ka go kwadisiwa ka fa molaong mme go setswe tsamaiso ya kabo ya lefatshe morago.

E rile a buisa makhanselara  a Ghanzi mo phuthegong ya khansele bosheng, Mme Keneilwe Laetsang a re,  ba lemogile fa matlotla a le mantsi mo lefatsheng, ke ka moo ba duleng ka lenaneo la go a kwadisa mme a re ba kwadisa fela a a nang le dingwaga tse di masome mararo kana kwa tlase ga foo.

Mme Laetsang a re, ba simolotse go kwadisa  matlotla mo metsaneng ya Tsootsha,  Karakubis le Ncojane mme ba a go tswelela ba kwadisa  le mo metseng e e mabapi.

Mokhanselara yo o itlhophetsweng, Rre Senaki Sethibane  ene a re lekgotla la kabo ditsha le tshwanetse  la ya kwa bathong  go ba tlhalosetsa ka lenaneo la go kwadisa matlotla.

Modulasetilo wa  khansele ya Ghanzi, Rre Director Tlharese, o supile fa dingwaga tse di masome mararao di le dinnye fela thata ka a re matlotla a mangwe ke a bogologolo.

Fa a araba dipotso, Mme Laetsang o ne a re ba setse melao ya lefatshe morago ke ka moo ba amogelang fela matlotla a a nang le dingwaga tse di masome mararo kana kwa tlase ga foo.  

A  re molao o dumela gore fa di feta foo jaanong  lefatshe ga e sa tlhole e le la gago o a bo o le latlhile. Bokhutlo