12 Mar 2014

Barutabana ba sekolo se sebotlana sa Mokubilo kwa kgaolong ya Tonota Bokone ba abetse molwetse mongwe mo motseng oo dimpho bosheng, mo moletlong o o neng o tshwerwe ka fa tlase ga setlhogo se se reng, ‘go thusa Motswana ka wena ke go ithusa’.

Fa a tlhalosetsa ba ba neng ba kokoanetse mo lwapeng loora Masole, morutabana Mme Ntswelengwe Makgabana a re morutabana o tshwanetse go nna le lerato mo baneng le go netefatsa gore bana ba gago ba itumetse ka nako tsotlhe.

A re nako nngwe o ne a lemoga gore mongwe wa bana ba gagwe ga a tsoga sentle mme a mmotsa gore mathata ke eng. Mosimane yo, ebong ngwana wa ga Mme Nnanabo Toteng, yo ba neng ba mo abela dimpho, o ne a tlhalosa fa mme mmaagwe a sa tsoga sentle.

Mme Makgabana a re seemo seo se ne sa gwetlha barutabana go ikokoanya gore ba kgone go thusa lelwapa le le amegileng. Fa a ntsha la gagwe, molaodi wa kgaolo potlana ya Boteti, Rre Loeto Porati, o ne a akgolela ba sekolo sa Mokubilo le lelwapa la ga Masole go bo ba nnile le bopelotlhomogi go thusa Mme Toteng.

A re barutabana bao ba supile gore tiro ya bone mo setshabeng ga se go abela bana thuto fela mo ba go duelelwang; ba supile boikarabelo ka go thusa yo o tlhokang thuso, selo se se rotloediwang ke tautona wa lefatshe leno.

Rre Porati o ne a rotloetsa Batswana ka kakaretso go bereka mmogo go thusa ba bangwe. A re tiro ya bobelotlhomogi ga e nke e nna nnyenyane gape ga e dirwe ke bahumi fela; e dira ke mang le mang go tsweng boteng jwa pelo ya gagwe.

“Ke akgola banni ba motse wa Mokubilo e bile ke ba rotloetsa go tswelela ka mowa wa boja mmogo gore tshaba tse dingwe di kgone go tsaya malebela, re tle re kgone re fitlhelele matshego a tebelopele ya setshaba ya ngwaga wa 2016.

Se le se dirileng se tla kopanya baithuti, botsadi le barutabana ka botlhokwa jwa lona bo lemosega mo setshabeng.” Rre Porati o ne a rotloetsa Mme Toteng go nna le tshepho le tumelo ya gore o tla fola. O ne a mo rotloetsa gore a seka a fela pelo, a ithuse ka dilo tse a ka di kgonang; a tlatsa ka gore a seka a baya fela mo bathong.

Moeteledipele wa lephata la tlhokomelo balwetse mo malwapeng. Mme Kegomoditswe Ramotswetla, o ne a lebogela barutabana go bo ba kgonne go thulanya ditlhogo go thusa Mme Toteng.  

Mme Ramotswetla o ne a tlaleletsa ka gore go sego letsogo le le abang go na le le le amogelang, a tlatsa ka gore ka jalo barutabana ba tla segofala ba kgone go tswelela mo matshelong a bone.

Le fa go ntse jalo, Mme Ramotswetla o ne a lela ka gore lenaneo la Home Based Care ga lena makalana a a ikemetseng ka nosi a le thusang; se se dirang gore thuso e ba e neelang balwetse e nne bokete.

O ne a kopa setshaba le badirela puso go bereka mmogo le makalana a ikemetseng ka nosi gore ba kgone go thusa ba ba tlhokang thuso. Mme Hakgamalang Nnanabo Toteng, yo o neng a sa kgone go emisa monyenyo, o ne a supa boitumelo bo bo seng kana ka sepe fa a lebogela barutabana ba sekolo sa Mokubilo mo tirong e ba e mo diretseng.  

Mme Toteng, yo o nang le bana ba basimane bale bararo, o ne a kopa baagisanyi go nna ba tla go mo sidila ka a nna fela mo bolaong. A re keletso ya gagwe ke go bona a thusitswe ka go agelwa ntlo kwa setsheng sa gagwe ka gore lelwapa le a nnang mo go lone ga se la batsadi ba gagwe.

Mme Toteng o ne a abelwa dikobo tse tharo, diaparo tsa bana, dijo, melora e tlhapang le e tlhatswang, bolao le setilo sa bana le bogole se se neng se tswa kwa khanseleng ya Borolong.Fa a ntsha lefoko la kgothatso, Kgosi ya motse wa Mokubilo, Rre Botshabelo Dijeng, o ne a rotloetsa dikereke tsa mo motseng go tla go rapelela Mme Toteng.

Kgosi Dijeng o ne a supa matswenyego a gore go na le dikereke mo motseng mme ga di kgone go supa boleng teng jwa tsone mo setshabeng ka go dira ditiro tsa boutlwelobotlhoko mo setshabeng.A re o ipotsa gore a dikereke tsa malatsi a di batla go duelelwa go thusa batho. Bokhutlo