12 Mar 2014

Phathi ya Umbrella for Democratic Change e kgadile e sa kgwe mathe dituelo tse di kwa godimo tsa ditirelo tse di akaretsang metsi le motlakase.

Kwa phuthegong ya phatlalatsa e e neng e tshwaretswe kwa Makaleng ka Matlhatso, leloko la phathi eo, Rre Mbaakanyi Smarts, o ne a supa fa Batswana ba rwele mokgweleo o o seng kana ka sepe wa dituelo tsa ditirelo.

Rre Smarts o supile fa sebe sa phiri e le go sa ikanyegeng ga go ntshiwa ga tsone ditirelo tsa go nna jalo, a supa fa Batswana ba lopiwa go duela madimadi le ntswa ba tshelela mo lenyoreng le mo lefifing le le boitshegang.

O boletse fa go ngomola pelo gore le ntswa tshaba ya lefatshe leno e tsweletse ka go lela ka matshwenyego a, puso e bo e sa dire sepe go a tsibogela. Mo ntlheng e nngwe, Rre Smarts o ne a kgala puso a re ga e dire go lekane go tlhamela Batswana ditiro.

A re bontsi jwa batho, segolo jang banana, ba tsweletse ka go gobeya mo mebileng go se sepe se ba se dirang go itshetsa, mathata a a reng go lebega a sa tshikinye puso ka go lebega e ntsi moriti o tsididi.

Rre Smarts a re go sa tsibogeleng dikgang di tshwana le tse, go supa fa puso e sa tseye tsia banana. A re puso e tshwanetse ya simolola go thusa ka lemmenyana ba ba sa berekeng, e le tsela nngwe ya go ba nolofaletsa dikgwetlho tsa botshelo.

Fa a bua ka ditsela, Rre Smarts o ne a supa fa seemo sa tsone se sa kgatlhise gotlhelele, a kaya fa dilo di simolotse go ya masweng fa puso e ntsha tlhokomelo ya ditsela dingwe mo dikhanseleng.

A re fa e sale tshwetso eo e dirwa ga go sepe se puso e kileng ya se dira go baya ditsela tsa lefatshe leno mo seemong se se kgatlhang e bile se babalesegile.

Sebui se sengwe kwa phuthegong eo, Rre Jiniva Pelaelo, o ne a gwetlha batsena phuthego eo go tlhola gore a dikarata tsa bone tsa Omang di siametse go ka ba letla go nna le seabe mo ditlhophong tsa setshaba tsa monongwaga.

O ne a ikuela mo go botlhe ba ba ikwadiseditseng ditlhopho go tlhokomela dikarata tsa bone tsa ikwadiso. Rre Pelaelo a re go a tshwenya gore e re Batswana ba sa itumedisiwe ke dilo di le dintsi mo tsamaisong ya lefatshe leno ba bo ba sa ntse ba le maoto a tshupa go tlhopha.

O ne a itela mo go ba ba sa ikwadisetsang ditlhopho go ikitaya ka thupana go dira jalo fa go ka nna le ikwadiso e nngwe ya tlaleletso.

Phuthego eo e ne e tshwerwe go rolela banni ba Makaleng ntlhopheng wa bopalamente wa kgaolo ya botlhophi ya Tati Bophirima, Rre Richard Gudu, le wa kgaolwana ya bokhanselara ya Makaleng, Rre Dintle Morakanyane. BOKHUTLO