10 Mar 2014

Diotele  di kgothaditswe go rotloetsa badiragatsi ka go reka dilo tse ba  di bopang  kgotsa ba di logang tsa ngwao.

Mokhanselara wa Makalamabedi Rre Moetetsi Mogalakwe o ntshitse kopo eo bosheng kwa Maun mo letsatsing la go ipela ka dilo tsa tiro ya diatla tse di betlilweng le tse di logilweng, e e neng e tshwerwe ka fa tlase ga setlhogo se se reng  ‘Tlotlomatsa tiro ya diatla mo gae.’

Rre Mogalakwe a re badiragatsi ba mo gae ba dira tiro e ntle fela thata ya go itlhamela mebereko le go tsholetsa ngwao ka nako e le nngwe. O tladitse ka gore morafe wa Nhabe o tswa goo-lowe o ntse o  tsholetsa ngwao ya one e e supang  nonofo le botshelo jwa one.

O file sekai  ka go loga ditlatlana mo  go bonwang thata gone kwa Nhabe. A re go loga ditlatlana go  tokafetse e  bile go okile batho ba le bantsi mo dingwageng.
A re tshaba e e senang ngwao ke mokang e latlhegileng, a tlatsa ka gore ke boammaaruri ngwao  ke boswa jo Batswana botlhe  ba tshwanetseng  go nna le jone.

A re mongwe le mongwe  o na le seabe  sa  go  somarela ngwao a bo a e dirisa go nyeletsa lehuma ka go  tlhama mebereko. Rre Mogalakwe a  re mohama wa bojanala o beilwe sentle go rotloetsa babetli  le balogi ka go reka dilo tse ba di betlang ebile ba di loga.

O gwetlhile  batsaya- karolo ba bangwe go thusa bagwebi ba ba botlana fa ba kgonang  teng. Fa a tswa la gagwe  Rre Mogomotsi  Madome o galaleditse  badiragatsi  ba Ngamiland go bo ba tokafaditse  dilo tse ba di logang le tse ba di betlang.

A re maiteko a puso a go bona gore badiragatsi ba a gola e bile ba a bonala, a tswa maduo ka gonne go le gontsi go tokafetse mo tirong ya diatla mo kgaolong ya Ngamiland. O tsweletse a rotloetsa batsaya -karolo ba bangwe go rotloetsa  badiragatsi eseng  fel a ka  go  ba bolelela  fa ba dira tiro e ntle  mme le ka go ntsha madi go reka tse ba di dirang.

Rre John Fella , mogolwane wa museum wa Nhabe,o gwetlhile  mongwe le mongwe go atla botlhokwa jwa bodiragatsi le ngwao mo Botswana. A re bodiragatsi ke se se simologileng mo malwapeng a rona.

A re, bogologolo  batho ba ne ba itirela didirisiwa tsa go apaya le go ja. Gompieno  bodiragatsi  bo  gola e le  karolo nngwe ya ngwao ya rona mme bo lemogiwa ke batho ba le bantsi mo lefatsheng  ka bophara.

A re badiragatsi ba Batswana ba okile  barati ba bodiragatsi go tswa kwa mafatsheng a mangwe, a tlatsa ka gore mo nakong eno ba bereka le ba  ngwao ba Canada kwa Shakawe, Etsha le Gumare go tsholetsa  bodiragatsi  le ngwao mo Botswana.

O supile gape gore ke tsela nngwe ya go rotloetsa  bodiragatsi  le ngwao,  bodiragatsi bo  dirilwe nngwe ya dithuto mo Botswana go kgona go bopa  badiragatsi go tswa  bonyennyaneng. Bokhutlo