09 Mar 2014

Kgosi Josephat Mwezi wa Kavimba a re ga a itumedisiwe ke banana ba motse oo ba ba inaakantseng le go bereka mo lenaneong la Ipelegeng ntswa e sa ntse e le baithuti.

“Baithuti ga ba sa tlhole ba batla go itebaganya le dithuto tsa bone, ba lebile madi a Ipelegeng,” go bua jalo Kgosi Mwezi kwa phuthegong e e neng e buisiwa ke Mothusa Tona wa Madi le Ditogamaano tsa ditlhabololo, Rre Vincent Seretse kwa Kavimba bosheng.

O ne a tlhalosa fa go tlwaela madi a Ipelegeng ga baithuti go baya bokamoso jwa bone mo diphatseng tsa go nna lotobo. Rre Seretse o ne a ntsha kgakololo tebang le kgang e, a kgothatsa botlhe ba ba berekang Ipelegeng mme ba itekanetse go tswa mo go yone, mme ba siele kwa mananeong a nyeletso lehuma, ka tota Ipelegeng e se tiro ya sennela ruri.

E rile a ntsha la gagwe, motshwara madi wa komiti ya ditlhabololo, Rre Ephraim Simasuku, a supa fa a ka se ke a rurifatse kgang ya baithuti ba ba mo Ipelegeng, mme mothusa tona a mo kopa go e tlhotlhomisa.

Mo go tse dingwe, banni ba Kavimba ba ne ba ngongoregela seemo sa ditsela mo kgaolong ya bone, ba supa fa ditsela tsa bone di se mo seemong se se itumedisang; e bile ba tlhalosa fa  seemo sa tsone se kgoreletsa metsamao ya dibese.

Mokwaledi wa khansele, Mme Rachel Jeremiah, o ne a araba ngongora eo ka go bolela fa ba tlaa baakanya tsela fela fa e senyegileng teng, ka madi a ba a abetsweng a le mannye.

Rre Seretse o ne a supa fa a itumeletse dipalo tsa banni ba ba ruileng dihutshane ka thuso ya lenaneo la nyeletso lehuma, tse go boletsweng fa di goroga kwa go masome a mabedi le botlhano.

“Ke itumelela gore lenaneo le le tokafaditse matshelo a lona ka bontsi, ke setse ke kopane le bangwe kwa Kazungula le Lesoma ba ba itumeletseng go dirisa lenaneo le.” Bokhutlo