05 Mar 2014

Khansele ya Borwa e tlaa simolola go gapa leruo le le sailang mo metseng ya Kanye le Moshupa. 

Rre Banks Nokgwe, mogolwane mo lekalaneng le le tsamaisang melawana ya khansele o tlhalositse se kwa kgotleng kgolo ya Kanye bosheng.

Rre Nokgwe a re khansele e amogetse molao kakanyetso o,  pele. O supile fa leruo leo le akaretsa dipodi, dikgomo, dipitse, dinku, ditonki le tse dingwe.

Rre Nokgwe o tlhalositse fa leruo lotlhe le le gobeyang mo motseng le mo marekisetsong a setshaba le tla a gapiwa le bo le isiwa kwa lefelong le khansele y e tlaa bong e le agile.

Legale o tlhalositse fa  beng ba leruo le le tlaa bong  le gapilwe, ba tlaa bidiwa gore ba tle go le rekolola, mme ba tla ka sesupo jaaka tshipi ya dikgomo go netefatsa fa leruo leo e le la bone.  Rre Nokgwe a re beng ba leruo ba  tlaa lebisiwa molato go lebilwe gore seruiwa ke sefe.

O tlhalositse gore fa kgwedi e ka feta mong wa leruo a sa tla go le tsaya, o tlaa duela sengwenyana eseng le rekisiwa.

A re nku, podi le kolobe di tla a gatisa dipula di le lesome le botlhano (P15) ka  letsatsi fa kgwedi ya ntlha e ka feta le sa tsewa, fa kgomo, tonki, mmoulo le pitse tsone di tlaa gatisa masome a mararo a dipula (P30) mme dintsa le dikoko di tlaa gatisa dipula di le lesome (P10) ka letsatsi.

Rre Nokgwe o tsweletse a tlhagisa gore ope  yo o ka disetsang leruo la  gagwe mo motseng kgotsa  mo mafelong a setshaba  o tlaa  atlholwa P 5000,a ba a  ka  tlhatlhelwa  mo  kgolegelong  dikgwedi tse pedi.

Bangwaketse  ba  iteetse  legofi  molao oo,  e bile  ba eletsa gore palamente  e o  amogele, ba supa fa ba sale  ba  senyediwa digotlo ke dikgomo tse di disediwang mo motseng.

Kgosi Malope II le  ene  o supile fa a  lebogela  molao kakanyetso oo, a  tlhalosa fa morafe wa  gagwe  o sale o sa  jesiwe di welang ke kgang eo, a re moswi Kgosi Seepapitso IV le  ene o tlhokafetse e le nngwe  ya  dikgang tse di neng di sa mo robatse. BOKHUTLO