Breaking News

Bogale ga bo supe taolo

16 Nov 2026

Borre ba rotloeditswe go nna dikao tse di molemo mo malwapeng ka go etelela pele mo go sireletseng le go aga bana ba ba nang le tlotlo go rotloetsa kagiso, go na le go dirisa bogale le dikgoka go supa taolo.

Fa a tlhalosa maikaelelo a bokopano jwa borre le basimane mo Maun ka Labone, Senior Superintendent, Batani Mosipi o tlhalositse fa bokopano jo ele bontlha jwa maiteko a ba sepodisi go leka go fokotsa borukutlhi jo gantsi bo dirwang ke borre go akaretsa go thubetsa le dipolaano.

“Bokopano jo bo direletswe go rotloetsa borre go abelana megopolo ka ditsela tse di siameng tsa go godisa bana le go fokotsa tiriso dikgoka ga mmogo le borukhuthi mo setshabeng,” a rialo.

Rre Mosipi o supile fa dipalo di supa fa banna e le bone ba dirang melato ka dipalo tse dintsi ka jalo go le botlhokwa go kopana le bone go sekaseka mabaka a a bakang seemo seo le go batla ditsela tsa go se fetola.

“Rre wa nnete ke yo o sireletsang e bile a kaela le go godisa lelwapa la gagwe e seng yo o supang bogale le nonofo ka go tsenya mosadi lebogo,” a rialo.

Rre Mosipi o gwetlhile borre go ikaga ka go ithuta go laola maikutlo a bone go tila go felela ba dirisa dikgoka fa ba lebanwe ke dikgotlhang.

Fa a bua ka seabe sa bogosi mo go ageng malwapa a a nang le boikarabelo, Kgosi Moeti Moeti wa kgotla ya Boyei o tlhalositse fa rre a tshwanetse go nna mosireletsi le motlhokomedi wa lelwapa, mme a re seemo sa malatsi ano se supa fa bangwe ba borre ba sa tlhole ba diragatsa maikarabelo ao.

O kopile borre go boela kwa metheong ya ngwao e e neng e rotloetsa boikarabelo jwa borre mo malwapeng gore go nne le ledula le kutlwano.

Fa a ruta kwa bokopang joo, Major Cocktail Keoreng wa sesole sa Botswana o gateletse botlhokwa jwa tlotlo le puisano mo go ageng batho ba ba nang le kutlwano.

Major Keoreng o rotloeditse borre go tsaya maikarabelo a go godisa bana ba basimane ka go ba kaela le go ba ruta maitsholo a a amogelesegileng.

“Maitsholo a ngwana a senola seabe sa batsadi mo tlhokomelong le kgodiso ya bone, mme ngwana yo o golang ka kaelo e e siameng o gola e le motho yo o nang le seabe se se molemo mo setshabeng,” a rialo.

Mongwe wa ba-tsa-ya karolo wa banana, Rre Thajorwayi Maekopo wa Disaneng kwa Maun, o tlhalositse fa bana ba ba ba kgalemelwang ke batsadi le go otlhaelwa diphoso ba gola ba na le maitseo a a botoka go na le ba ba sa kgalemelweng.

O gateletse fa kgodiso ya ngwana e tshwanetse go simolola a sa le monnye ka go nne e le yone motheo wa maitsholo a gagwe fa a gola.

Mo boikuelong jwa gagwe, Officer Commanding wa Distric 5 ya Sepodisi, Senior Superintendent Poloko Oteng o kopile morafe go tshwaragana le sepodisi go lwantsha borukhutlhi segolobogolo ka go bega ditiragalo tsa tshenyo le tse di seng kafa molaong gore go agiwe setshaba se se sireletsegileng.

Bokopano jo, jo bo neng bo kokoantse borre le basimane ba ka feta makgolo a matlhano, bo dumalane maikaelelo le maitlamo a a akaretsang go tsaya boikarabelo jwa go godisa bana ba basimane ka tsela e e tlaa agang morafe o o senang tiriso ya dikgoka.

Ba dumalane gape ka go tsosolosa ditsamaiso tsa ngwao tsa pele tse di neng di thusa go godisa bana ba ba nang le boikarabelo mo setshabeng. BOKHUTLO

Source : BOPA

Author : Gaolethoo Kgatitswe

Location : Maun

Event : Bokopano

Date : 16 Nov 2026