05 Mar 2014

Baithuti ba sekolo se segolwane sa Ghanzi ba rotloeditse le go tsibosa baithuti ka bone ka  mosola wa go ikwadisetsa ditlhopho le go tlhopha.

E rile a amogela baithuti kwa sekolong seo ka Labotlhano Tlhakole a tlhola malatsi a le lesome le borobabobedi mo tshokologong, modulasetilo wa mokgatlho wa Democracy Youth Club , o e bile e le moithuti  mo sekolong seo, Ditshupo Morris, a  kgothatsa  baithuti ka ene go  ya go ikwadisetsa ditlhopho pele ga ikwadiso ya tlaleletso e ya bokhutlong.

A re banana ba bantsi thata mo lefatsheng la Botswana e bile ke bone bontsi jwa nako  ba ngongoregelang ditsamaiso di le dintsi.  A re fa ba batla lentswe la bone le utlwala ke fela fa ba ka tlhopha gore ba  rome baemedi  ba ba dumelang ba ka diragatsa dikeletso tsa bone. 

Ke sone se ba simolotseng mokgatlho o o ka rotloetsang baithuti go ikwadisa le go tlhopha. Morris  a re maikaelelo a bone e le ba mokgatlho  wa Democracy Youth Club ,ke go kgothatsa le go rotlotsa baithuti ka dilo tse di farologanyeng  tse di ba amang e le banana.

O tsweletse  a re mo nakong ya gompieno ba remeletse thata mo go buisaneng le baithuti gore ba ikwadise ka ba mo nakong ya ditlhopho.

Sheryline Sibanda yo le ene e leng moithuti kwa sekolong seo e bile e le mokwaledi mo mokgatlhong  wa Democracy Youth Club  a  re fa baithuti ba ka seke ba ikwadisetsa ditlhopho,lentswe la bone ga le na go utlwala. Mme a ba gakolola gore tlhopho e nngwe le e nngwe e na le seabe ka jalo, ba seka ba lebela tlhopho ya bone kwa tlase.

E rile a ba kgwa dikgaba mogolwane go tswa ko lephateng la IEC, Rre Carthage Modisane, a re go ka nna molemo thata fa ba ka ikwadisa ka dipalo tse di kwa godimo, mme a ba rotloetsa go ikwadisetsa mo matlhophelong a a mo sekolong a re bontsi jwa nako bontlhopheng ba a ba kopa ba ya go ba kwadisetsa ditlhopho kwa  dikgaolong tsa bone  mme e se magae a baithuti ba,  a re go dira jalo ke molato.

Rre Modisane o ba kopile go ikwadisa mo sekolong a re fa e le gore nako ya ditlhopho fa e atamela ba tlaa bo ba na le nnete e e tletseng ya gore fa go tlhophiwa ba tlaa bo ba le kae ke gone ba tlaa tsayang phudugo ka a re e teng mo molaong wa ditlhopho. BOKHUTLO