27 Feb 2014

Lephata la botsogo le kopile puso gore le ipaakanyetse dikoloi tsa lone go lwantsha seemo sa letlhoko la dipalamo.

Fa a bua mo phuthegong ya kgotla kwa Monwane mo kgaolong ya Kweneng  ka Labobedi, tona wa lephata leo Dr John Seakgosing a re go isa ditlamelo kwa bathong mo lephateng leo go  kgorelediwa  ke sebaka se dikoloi tsa lone di se tsayang di isitswe kwa CTO go  baakanngwa.

A re, “jaaka lephata le le  tshwereng  selo se se botlhokwa se se tshwanang le botsogo jwa setshaba, ga go a a siama gore dikoloi tsa lone di bo di tswaletswe  lebaka le le leele kwa CTO di emetse go baakanngwa”.

O tswelela a re ,“ke tsholofelo ya bone gore tsamaiso e ntsha e tla dira gore dikoloi di baakangwe ka bonako mme se se tokafatse go isetsa batho ditlamelo.”

Dr Setlalekgosi  a re, la bofelo fa a tlhola ba CTO go ne go nale di dikoloi di le 443 tsa lephata la gagwe kwa teng , 188 ele di amulense, seemo se a reng  se gomagometsa  go phutlhamisa   ditlamelo tsa botsogo tsa setshaba.

A re bosheng, lephata la botsogo le tlhophile dikoloi di le  177 go tswa kwa dikoloing tse di kwa CTO  mme la di baakanyetsa  go di dirisa mo  dikokelong le dikokelwaneng. O tsweletse a re ,147 wa dikoloi tseo  di  setse di baakantswe mme lephata le ikaelela go kopa tse dingwe go di baakanya le bo le di dirisa.

Rev Setlalekgosi a re “Re tlhophile  mediro ya dikoloi  e e  tshepagalang mo lefatsheng  la rona, mme re solofela  fa se se   tla thusa  go rarabolola  matshwenyego a dikokelwana  tse   di ntseng lobaka di sena dikoloi.”

A re lephata la gagwe gape le batla go ipaakanyetsa dikago tsa lone ka gonne go tsaya lobaka  gore lephata la  dikago le baakanye dikago. A re puso e ikaelela  go isa ditlamelo gautshwane le batho, ke sone se  dikokelo di le  543 mo go tse 700 mo lefatsheng leno di fa batho dithuso tsa di ARV.

A re go atolosa dikokelwana go tla bo go tla le  kago ya matlo a bodiredi. A re puso e tsere tshwetso ya gore dikago tshotlhe, go balelwa le matlo a  badirela puso a  tsenngwe motlakase. A re dituelo tsa ba Ipelegeng le tsone di tla okediwa mo bogaufing, le fa go ntse jalo ga a bolela gore go tla oketswa ka bokae. BOKHUTLO