27 Feb 2014

Boradithekisi ba Jwaneng ba akgoletswe go tokofatsa ditirelo tsa bone.

Mo potsolotsong bosheng, mogolwane wa ofisi ya tsa mesepele kwa Jwaneng, Rre Kealeboga Tshwene, a re go lebega fa botsalono kana tirisano mmogo magareng ga boradithekisi le bapagami e tokafala, se a boletseng se ka rurifadiwa ke phokotsego ya dingongora tse ba nnang ba di begelwa.

O supile fa ba ise ba amogele dipego dipe tsa go sa tseweng sentle ke boradithekisi ga bapagami go tswa ngwaga o o simolola, fa go tshwantshanngwa le tse tharo tse di neng tsa begwa ngwaga o o fetileng, tse mo go tsone go supilweng fa bapagami ba neng ba tlhoka go tsewa sentle.

Mo godimo ga moo, Rre Tshwene o kaile fa mangwe a mabaka a a ka tswang a dirile gore go nne le tokafalo mo ditirelong tsa dipalamo tsa setshaba e le koketsego mo dipalong tsa dithekisi go tswa kwa go 35 wa dithekisi tse di neng di bereka go ya kwa go tse 55 ngwaga ono.

A re le fa go ikopela teseletso ya dikhombi go amogelesega, ga ba ise ba amogele le fa e le nngwe go fitlha jaana. Se, o kaile fa se ka tswa se bakwa ke go bo Jwaneng e le toropo e potlana ka jalo e setse e tletse ka dithekisi tse di ntsi.

A re go nneng teng ga lekgotla la dithekisi mo Jwaneng go ka tswa le gone go thusitse gore boradithekisi ba sale morago melao le melawana ya kgwebo ya serodumo sa go nna jaana. O akgotse lekgotla leo go bo le leka ka bojotlhe go bona gore boradithekisi ba dirisanya sentle le bapagami, le bapagami fela jalo.

“Re tla fela fa go tlhokega, go thusa go rarabolola bothata jo bo teng”, a tlhalosa fela jalo. Le fa go ntse jalo, o supile fa dikgetsi tsotllhe tse di begilweng di ne di tseelwa kwa godimo go agisanya bobedi jo mme fa go tlhokega mokgweetsi wa thekisi a tseelwe dikgato tse di maleba.

A re morago ga ditshekatsheko, mokgweetsi wa thekisi o ne a ka atlholwa go duela madi a a kana ka P400 go ya kwa go P800 fa a bonwe molato. BOKHUTLO