26 Feb 2014

Matshelo a batho kwa motseng wa Kazungula a mo kotsing jaaka ditau di ronoka mo motseng oo.

Mo nngweng ya ditiragalo go bolelwa fa tau e ne ya bolaya ntsa ya ga Rre Nkgawa Kakana.  Rre Kakana a re tau eo e ne ya sala ntsa morago mme ya tsena mo lwapeng la gagwe.

A re sebatana seo  se ne sa ralala malwapa a le mmalwa go ya kwa mabitleng, gautshwane le lelwapa la gagwe. O tsweletse a re ka go ne go le lefifi, baagisani ka ene le  babereki  ba se kae ba Bush Tracks Safari ba ne ba tshuba melolo ntlheng ya kwa go duma ga ditau go neng go utlwala teng thata.

Modiredi wa lephata la diphologolo mo kgaolong eo, Rre Mafoko Kangumu, a re maroo a ne a santse a bonala mo mosong wa  letsatsi  le le latelang mme ba kgonne go bona gore e ne ele  tau e tonanyana. 

Rre Kangumu a re maroo a mangwe a ne a bonala mo lefelong leo, se se dirileng gore ba dumele fa e se tau  e le nngwe mme  e le ditau  tse di nang le bana. A re se ke tiragalo ya ntlha ya mofuta o e diragala mo motseng o.

A re o akanyetsa fa ditau tse di  tsene mo motseng ka gonne bojang jo bo mo lefelong leo bo ne bo  di kgoreleditse go lemoga  fa di tsena mo lefelong le go nnang batho.

A re gape go ka tswa go dirwa ke gore motse  wa Kazungula o a gola  ka jalo o  felela o tsena mo lefelong le le nnang diphologolo. Go sireletsa diruiwa mo motseng, morafe o ka  koba ditau tse o dirisa dikoloi tsa one kgotsa go di hula ka tlhobolo.

Mongwe wa banni Rre Muti Muti, a re go lebega okare ditau dI santse di ronoka mo motseng segolo thata kwa mabitleng. O supile matshwenyego ka tshireletsego ya bana ba dikole le babereki  ba ba nnang mo Kazungula, ba a reng ba tshwanetse ba feta fa mabitleng go ya sekolong le tironmg makuku mo dinakong tse dingwe  le bosigo. BOKHUTLO